MHE. MAKORI: MARUFUKU KUCHEZEA MASLAHI YA WAKULIMA

Tarehe ya kuwekwa: August 6th, 2024

Na Alex Nelson Malanga

Afisa Habari----Mji Mbinga.

Mbinga.  Mkuu wa Wilaya ya Mbinga Mhe. Kisare Matiku Makori amesema serikali haitakuwa tayari kuona maslahi yanayohusiana na wakulima yanachezewa kwa namna yoyote ile.

Mhe. Makori aliyasema hayo siku ya Jumanne (Agosti 6) kufuatia kuwepo kwa malalamiko dhidi ya baadhi ya Vyama vya Ushirika katika wilaya yake kupora haki za wakulima.

Alisema kati ya malalamiko anayopelekewa ofisini kwake, masuala yanayohusiana na vyama vya ushirika yanashika namba moja huku akisema kilio cha  wakulima ni ukomo wa madeni na malipo ya awamu ya pili.

“Hii haikubaliki, lazima tulisimamie kwa ukaribu” Mhe. Makori alisema wakati wa mkutano na kamati ya siasa ya Mkoa wa Ruvuma uliofanyika katika Halmashauri ya Mji wa Mbinga chini ya mwenyekiti wa CCM-Mkoa wa Ruvuma Bw. Oddo Mwisho.

Mhe. Makori alisema kuwa tayari amewaagiza wakurugenzi wa Halmashauri za Mji wa Mbinga na Wilaya ya Mbinga wawaandikie maafisa ushirika na viongozi wote wa vyama ushirika nini cha kufanya kuhusu ukomo wa madeni na malipo ya wakulima.

 “Nimewataka wawaandikie kuwa hakutakuwa na uidhinishwaji wa ukomo wa madeni na hakutakuwa na malipo ya wakulima kwenye vyama vya msingi bila taarifa kufika ofisi ya mkurugenzi,” alisema.

 Aliongeza: “Na baada ya kufika ofisi ya mkurugenzi, wakaguzi wa ndani wa Halmashauri watapaswa kufanya ukaguzi.”

Kwa mujibu wa Mhe. Makori, kati ya vyama vya ushirika 120 vilivyopo katika mkoa wa Ruvuma, 100 vipo wilaya ya Mbinga.

Alikwenda mbali kufafanua kuwa kati ya vyama hivyo 100 vilivyopo Wilaya ya Mbinga, vyama 21 vipo Halmashauri ya Mji wa Mbinga na 79 Halmashauri ya Wilaya ya Mbinga.

 “Wilaya ya Mbinga iko vizuri katika kilimo cha mahindi na kahawa---ukicheza kidogo na maslahi yanayohusiana na wakulima, utakuwa umetikisa msingi wa uchumi wa wananchi wa Wilaya hii,” alihitimisha Mhe. Makori.

 Mkutano wa Jumanne uliwaleta pamoja viongozi wa CCM ngazi ya Wilaya na Mkoa, wataalamu wa Halmashauri za Mji wa Mbinga na Wilaya ya Mbinga pamoja na wakuu wa taasisi za wilaya ya Mbinga.