MHE MAKORI: TUZINGATIE VIGEZO VYA MBIO ZA MWENGE WA UHURU

Tarehe ya kuwekwa: April 4th, 2024

Na Alex Nelson Malanga

Afisa Habari----Mbinga Mji

Mbinga. Mkuu wa Wilaya ya Mbinga Mhe. Kisare Matiku Makori amewataka wataalamu wa Wilaya ya Mbinga kuzingatia vigezo vya  mbio za Mwenge wa Uhuru  2024 na vipengele vyake ili kuibuka kinara.

Ofisi ya Waziri mkuu imeandaa vigezo 10 vitakavyozingatiwa na vimeandaliwa kwa kuzingatia ujumbe wa mbio za Mwenge wa Uhuru na mahitaji ya serikali katika kipindi hiki.

Vigezo hivyo vyenye jumla ya maksi 100 ni pamoja na ufanisi wa usimamiaji wa miradi ya maendeleo (maksi 32), ufanisi katika mapokezi ya Mwenge (maksi 6), uzingatiaji wa itifaki za mwenge (maksi 8) na umahiri katika uandishi, usomaji na uwasilishaji wa risala ya utii kwa Mheshimiwa Rais (maksi 8).

Vigezo vingine ni uraghibishaji wa falsafa ya mwenge kwa mwananchi (maksi 4), uwezeshaji wa vijana (maksi 20), uwezeshaji wa makundi yenye mahitaji maalumu na ukatili wa kijinsia (maksi 4) na juhudi zinazochukuliwa katika mapambano dhidi ya VVU/Ukimwi, dawa za kulevya na Malaria (maksi 3).

Orodha ya vigezo pia inahusisha mapambano dhidi ya rushwa na changamoto za lishe duni (maksi 5) na ushiriki katika uhifadhi wa mazingira na uchaguzi wa serikali za mitaa (maksi 10).

“Wakati wa maandalizi ya kupokea Mwenge wa Uhuru tunapaswa kuzingatia vigezo vyote ili tuibuke vinara katika mbio za Mwenge huo. Hatuna sababu ya kushindwa,” alisema Mhe. Mkuu wa wilaya wakati wa kikao cha kamati ya sherehe ya wilaya kilichofanyika Aprili 4, 2024 katika Halmashauri ya Mji wa Mbinga.

Mkoa wa Ruvuma unatarajia kupokea Mwenge wa Uhuru Juni 8, 2024 ambapo utakimbizwa hadi Juni 15 ya mwaka huu.

Afisa Utamaduni wa Halmashauri ya Mji wa Mbinga Bi. Fausta Sabiyanka alisema kwa mwaka huu Mwenge wa Uhuru utakimbizwa katika mikoa 31 na Halmashauri za Wilaya  195 kwa siku 195.

Mbio hizo zilizinduliwa rasmi mkoani Kilimanjaro April 2, 2024 na kilele chake kitakuwa Oktoba 14 mwaka huu mkoani Mwanza.

Kwa mwaka huu, ujumbe wa mbio za Mwenge wa Uhuru utahusu uchaguzi wa serikali za mitaa na uhifadhi wa mazingira chini ya kauli mbiu; "Tunza mazingira na shiriki uchaguzi wa serikali za mitaa kwa ujenzi wa Taifa endelevu."