MILIONI 59 KUWANUFAISHA WANANCHI WA VIJIJI NA MITAA 18 KUPITIA MIRADI YA MAENDELEO

Tarehe ya kuwekwa: April 3rd, 2024

Na Alex Nelson Malanga

Afisa Habari----Mbinga Mji

Mbinga.  Ofisi ya Mbunge wa jimbo la Mbinga Mjini, mkoani Ruvuma imetoa kiasi cha shilingi milioni 58.78 kutoka Mfuko wa Jimbo kwaajili ya kuchochea utekelezaji wa miradi mbalimbali ya maendeleo katika vijiji na mitaa 18.

Zoezi hilo la ugawaji wa pesa hiyo iliyotolewa katika mfumo wa taslimu na vifaa vya ujenzi, liliendeshwa AprilI 3, 2024 na Mwenyekiti wa Halmashauri ya Mji wa Mbinga Mhe. Kelvin Mapunda kwa niaba ya Mbunge wa Jimbo la Mbinga Mjini Mhe. Jonas Mbunda.

Kati ya Shilingi milioni 58.78, kiasi cha shilingi milioni 35.72 ni fedha taslimu na shilingi milioni 23.06 ziko katika mfumo wa vifaa ambavyo ni mabati 545 na misumari, pamoja na kuchangia kulipa mafundi.

 “Tayari Halmashauri imehamisha shilingi milioni 35.72 kwenda katika akaunti za kata na vijiji kwaajili ya utekelezaji wa miradi kama ilivyoridhiwa na kikao cha kamati ya Mfuko wa Jimbo kilichofanyika Januari 11, 2024,” alisema Mh. Mapunda katika hafla iliyofanyika katika ofisi za Halmashauri ya Mji wa Mbinga.

Akielezea kuhusu shilingi milioni 23.06 alisema fedha hiyo ni kwaajili ya kuchangia uezekaji wa shule ya msingi Kitunda, zahanati ya Miembeni, zahanati ya Mlowoka, nyumba ya mganga wa zahanati ya Masimeri, ununuzi wa misumari na kuchangia kulipa mafundi.

Akizungumza baada ya makabidhiano, diwani wa kata ya Kitanda Mhe. Aureus Ngonyani alimshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan pamoja na Mhe. Mbunda kwa kuwajali wananchi.

“Tutazidi kumpa ushirikiano Mhe. Rais na Mhe. Mbunge kwakuwa wanaonesha nia ya dhati ya kufanya kazi na sisi,” alisema Mhe. Ngonyani kwa niaba ya madiwani wengine ambao kata zao zimenufaika na fedha hizo za Mfuko wa Jimbo.