MITI 110 YAPANDWA KILELE CHA SHEREHE ZA MUUNGANO

Tarehe ya kuwekwa: May 3rd, 2024

Na Alex Nelson Malanga

Afisa Habari----Mbinga Mji

Mbinga. Maadhimisho ya sherehe za miaka 60 ya Muungano katika wilaya ya Mbinga, mkoani Ruvuma yalitamatishwa kwa kupanda miti 110 katika shule ya Sekondari Makita iliyopo katika Halmashauri ya Mji wa Mbinga.  

Zoezi la upandaji miti lilofanyika April 26, liliongozwa na Mwenyekiti wa Chama Cha Mapinduzi (CCM) Wilaya ya Mbinga Bw. Joseph Mdaka.

Walioungana na Bw. Mdaka katika zoezi hilo ni katibu tawala wa Wilaya ya Mbinga Bi. Pendo Daniel, Mwenyekiti wa Halmashauri ya Mji wa Mbinga Mhe. Kelvin Mapunda pamoja na Makamu wake Mhe. Alex Andoya.

Wengine ni Diwani wa kata ya Masumuni Mhe. Laurent Vitus Gomano, Wakuu wa Idara na Vitengo katika Halmashauri ya Mji wa Mbinga na Afisa Mtendaji wa kata ya Masumuni Bi. Doris Mbele.  

Kaimu Mkuu wa kitengo cha Maliasili na Mazingira katika Halmashauri ya Mji wa Mbinga Bi. Gema Mmanda aliahidi kuhakikisha miti iliyopandwa inatunzwa na kukua vizuri.

“Kama kiongozi ninayehusika na mazingira katika Halmashauri ya Mji wa Mbinga, nitashirikiana na walimu kuhakikisha miti iliyopandwa leo (April 26) inafuatiliwa kwa ukaribu na kutunzwa vizuri,” alisema Bi. Gema.

Afisa Misitu wa Mji wa Mbinga Bw. Sota January Ndunguru alisema waliamua kupanda miti katika shule ya Makita ili kuwafanya wanafunzi wajue umuhimu wa kupanda miti na thamani yake.

“Upandaji wa miti shuleni unatengeneza mazingira ya wanafunzi kupata hewa safi na hivyo kuwafanya wafurahie maisha ya shuleni,” alisema Bw. Ndunguru.

Alisema miti iliyopandwa ni aina ya Leucaena ambayo ina sifa ya kufyonza hewa ya kaboni na hivyo kutengeneza mazingira ya hewa safi ya oksijeni