MJI MBINGA YAKUSANYA MAPATO KWA ASILIMIA 100

Tarehe ya kuwekwa: July 15th, 2024

Na Alex Nelson Malanga

Afisa Habari----Mji Mbinga

Mbinga. Halmashauri ya Mji wa Mbinga imefikia kwa asilimia 100 lengo la makusanyo ya mapato yake ya ndani kwa mwaka wa fedha 2023/24.  

Kaimu Mkurugenzi wa Halmashauri hiyo Dkt. Kung’e Nyamuryekung’e Jumatatu (Julai 15) alisema kuwa katika kipindi hicho Halmashauri ilifikia lengo la kukusanya Sh2.5 bilioni.

“Tumefikia lengo la kukusanya Sh2.5 bilioni na hii imechagizwa na kuongezeka kwa ufanisi wa timu ya kukusanya mapato pamoja na utayari wa wananchi kulipa kodi bila shuruti,” alisema Dkt. Nyamuryekung’e.

Alielezea kuwa kati ya Sh2.5 bilioni, Sh1.8 bilioni ni mapato ya ndani yasiyolindwa na Sh0.7 bilioni ni mapato ya ndani lindwa.

Vyanzo vyenye mchango mkubwa kwenye mapato ya ndani yasiyolindwa ni ushuru wa mahindi, ushuru wa kahawa, leseni za biashara, kodi ya pango,ushuru wa huduma, mauzo ya viwanja na ushuru wa maharage.

Mkuu wa Wilaya ya Mbinga Mhe. Kisare Matiku Makori Jumatatu (July 15) aliupongezi uongozi wa Halmashauri ya Mji wa Mbinga kwa kufikia lengo la kukusanya Sh2.5 bilioni.

“Mmefanya kazi nzuri sana. Nawasihi mwaka huu wa fedha  (2024/25) muongeze kasi zaidi ili ikiwezekana tuvuke lengo,” alisema Mhe. Makori.

Kwa mwaka huu wa fedha, Halmashauri inatarajia kukusanya Sh3.3 bilioni.

Kwa upande wake Mwenyekiti wa Halmashauri ya Mji wa Mbinga Mhe. Kelvin Mapunda aliahidi kushirikiana na timu ya wataalamu wa Mji Mbinga kuhakikisha wanapanua wigo wa mapato.

“Tutahakikisha tuna buni vyanzo vipya vya mapato ili kuongeza makusanyo yetu,” alisema Mhe. Mapunda.