MJI MBINGA YAPOKEA BILIONI MOJA KUBORESHA MIUNDOMBINU YA ELIMU

Tarehe ya kuwekwa: July 8th, 2024

Na Alex Nelson Malanga

Afisa Habari----Mji Mbinga

Mbinga. Serikali imeipatia Halmashauri ya Mji wa Mbinga Sh1.075 bilioni kwaajili ya ujenzi wa miundombinu ya elimu kwa lengo la kuboresha zaidi elimu ya msingi na sekondari.

Kati ya fedha hizo, Sh419.1 milioni zimetolewa kupitia Mradi wa uboreshaji elimu ya awali na msingi (BOOST) na Sh655.553 kupitia mradi wa elimu ya sekondari (SEQUIP), kwa mujibu wa kaimu Mkurugenzi wa Mji Mbinga Dkt. Kung’e Nyamuryekung’e.

Dkt. Nyamuryekung’e alisema kupitia mradi wa SEQUIP, Halmashauri itajenga shule mpya ya sekondari Bethrehem na nyumba ya walimu (2in1) katika Shule ya Sekondari Dkt. Philip Mpango.

Kwa upande wa mradi wa BOOST, alisema kuwa Halmashauri itajenga madarasa 15 na matundu 30 ya vyoo katika shule za msingi Beruma, Masumuni, Nazareth na Changarawe.

“Tunaishukuru Serikali ya Jamhuri ya Muungano wa Tanzania chini ya Mheshimiwa Rais Dkt. Samia Suluhu Hassan kwa kutupatia fedha kwaajili ya kuboresha ubora wa elimu ya shule ya msingi na sekondari,” alisema Dkt. Nyamuryekung’e.

Aliongeza: “Tunaahidi kuwa kila senti itatumika kama ilivyokusudiwa.”