MJI WA MBINGA WANG’AA BAADA YA KUTAMATIKA KWA KAMPENI YA MANGOSONGO OPARESHENI SAFISHA MJI: MBINGA ING'AE

Tarehe ya kuwekwa: September 11th, 2023

Na Alex Nelson Malanga

Afisa Habari---MTC

Mbinga. Mji wa Mbinga umetakata, mji wa Mbinga unang’aa, Mji wa Mbinga unameremeta, hivyo ndivyo unavyoweza kusema, shukrani kwa kampeni ya usafi ijulikanayo kama Mangosongo Oparesheni Safisha Mji: Mbinga ing’ae.

Kampeni hiyo ambayo ni zao la Mkuu wa Wilaya ya Mbinga Mhe. Aziza Mangosongo, ilianza September 4 na kutamatika Jana, September 10.

Akizungumza wakati wa kilele cha kampeni hiyo katika uwanja wa Sekondari Makita, Mhe.Mkuu wa wa Wilaya alisema kabla ya kuanza kwa kampeni hali ilikuwa mbaya---takataka zilizagaa mtaani, vichaka vilikuwa vingi hasa kwenye maeneo ya taasisi na maeneo ya kuzunguka nyumba za watu.

“Sasa hivi ukipita maeneo ya sokoni, mitaani na barabara kuu hakuna taka wala nyasi,”alisema Mhe. Mangosongo.

Aliongeza: “Natoa wito, desturi hii ya kufanya usafi iendelee bila kusimamiwa.”

Aliwataka wamiliki wote wa bustani zilizochini ya Halmashauri ya Mji wa Mbinga wazihudumie na wakishindwa zirejeshwe kwa mamlaka husika ili wapewe watu wengine.

Alihimiza ujenzi wa vyoo bora katika makazi ya watu na sehemu za starehe.

Hili, aliongeza, liende sanjari na kuweka mazingira safi ya vyoo hivyo.

“Katika maeneo ya starehe (baa), kuwe na muhudumu wakupita mara kwa mara kuhakikisha vyoo ni visafi,”aliagiza Mhe. Mangosongo.

Alitoa miezi mitatu kwa maeneo ambayo vyoo vimejaa vijengwe vipya.

Kwa vyoo vilivyojengwa kwa nyasi au makuti aliamuru viondolewe na vijengwe vya kisasa.

Alisema zoezi la usafi litaendelea kila Jumamosi ya wiki mpaka pale atakaporidhishwa na usafi wa mazingira maeneo yote.

“Tunafunga kampeni hii leo (jana) lakini zoezi la usafi linaendelea,”alisema Mhe. Mangosongo.

Kwa mujibu wa Mkuu huyo wa Wilaya, kampeni hii itakuwa ikifanywa kila baada ya miezi mitatu.

Tafsiri yake ni kwamba itazinduliwa tena mwezi wa kumi na mbili.

Pamoja na usafi wa mazingira, Mhe. Mangosongo aliwataka wakazi wa Mbinga wawe wasafi  wa roho pia.

“Mnapaswa kuwa na moyo safi usio na kinyongo wala makandokando,”alishauri.

Alihitimisha kwa kunukuu kifungu cha biblia kutoka Mathayo Mtakatifu 5: 8:“Heri wenye moyo safi, maana hao watamwona Mungu.”

 Pamoja na Mkuu wa Wilaya, bonanza la usafi lilihudhuriwa na viongozi wengine ambao ni Katibu Tawala wa Wilaya ya Mbinga Bi. Pendo Daniel na Mkurugenzi wa Halmashauri ya Mji wa Mbinga (MTC) Bi. Amina Seif, ambaye baadaye alipatwa na dharura na hivyo kukaimisha  nafasi hiyo kwa Dkt Kung’e Nyamuryekung’e.

Wengine waliohudhuria ni madiwani wa Kata mbalimbali, wakuu wa idara kutoka ofisi ya Mkuu wa Wilaya na Halmashauri ya Mji wa Mbinga pamoja na watendaji wa Kata na Mitaa.

Akizungumza kabla ya kuondoka katika bonanza hilo Bi. Amina alisema usafi wa mazingira ni muhimu katika mapambano dhidi ya maradhi.

Kwa mujibu wa Shirika la Afya Duniani (WHO), upungufu wa usafi wa mazingira ni sababu kuu ya kuenea kwa maradhi duniani.

“Usafi wa mazingira una manufaa makubwa sana. Si wakati wa kuchekea uchafuzi wa mazingira,” alisema Bi. Amina.

Akizungumza baada ya Mkurugenzi kuondoka, Kaimu Mkurugenzi Dr Nyamuryekung’e alisema usafi wa mazingira ni muhimu sana ili kuhakikisha kuwa afya inazingatiwa na kuzuia uwezekano wa binadamu kukabiliana na athari za taka.

Afisa Afya wa Halmashauri ya Mji wa Mbinga Felix Matembo alisema: “Tunawajibu kama Serikali kuhakikisha kuwa wananchi wanaishi katika mazingira mazuri. Wananchi nao wafanye sehemu yao badala ya kusubiri kila kitu kutekelezewa na serikali.”