MKURUGENZI WA HALMASHAURI YA MJI WA MBINGA ATAKA KASI KATIKA UKUSANYAJI MAPATO

Tarehe ya kuwekwa: September 29th, 2023

Na Alex Nelson Malanga

Afisa Habari….MTC

Mbinga.  Katika jitihada za kuongeza ukusanyaji wa mapato, Mkurugenzi wa Halmashauri ya Mji wa Mbinga (MTC) Bi. Amina Seif  amewataka watendaji wa kata kushirikiana na watumishi wengine wa Halmashauri hiyo kuziba mianya inayochangia upotevu wa mapato.

Hayo yalisemwa Septemba 26, 2023 wakati wa mkutano uliowaleta pamoja Bi. Amina, baadhi ya wakuu wa idara na watendaji wa kata mbalimbali za Halmashauri ya Mji wa Mbinga kujadili namna bora ya kuongeza mapato ya Halmashauri hiyo.

Akizungumza wakati wa mkutano uliofanyika katika Halmashauri ya Mji wa Mbinga Bi. Amina aliwataka watendaji wa kata kushirikiana na watumishi wengine wa Halmashauri hiyo katika kuongeza mapato.

“Hakikisheni mnaziba mianya ya upotevu wa mapato. Mnisaidie katika ukusanyaji wa mapato,” alisisitiza Bi. Amina.

Alisema yeye kwa kushirikiana na wasaidizi wake ataandaa utaratibu wa namna ya kutambua kata itakayofanya vizuri zaidi katika ukusanyaji wa mapato kila mwezi.

Bi. Amina alihitimisha kwa kusema ushirikiano baina ya watendaji wa kata na watumishi wengine wa Halmashauri usiishie kwenye ukusanyaji wa mapato tuu, bali uende mbali katika usimamizi wa  usafi wa mazingira.