MKURUGENZI WA HALMASHAURI YA MJI WA MBINGA ATAKA KASI ZAIDI NA VIWANGO KATIKA UTEKELEZAJI WA MIRADI YA MAENDELEO

Tarehe ya kuwekwa: September 22nd, 2023

Na Alex Nelson Malanga

Afisa Habari---MTC

Mbinga. Mkurugenzi wa Halmashauri ya Mji wa Mbinga (MTC)  Bi. Amina Seif Septemba 20, 2023 aliwataka mafundi kuongeza kasi katika ujenzi wa miradi ya maendeleo ili ikamilike kabla ya Septemba 30, 2023, lakini kwa ubora wa hali ya juu.  

Wito huo ulitolewa wakati wa ziara yake kwenye miradi mitano inayotekelezwa katika Halmashauri ya Mji wa Mbinga ikiwa na thamani ya jumla ya shilingi bilioni 1.1.

Miradi hiyo pamoja na gharama zake kwenye mabano ni kituo cha afya cha Mbangamao (Shilingi milioni 500), Shule ya Msingi Mpepai Mkondo wa Mwamko (Shilingi milioni 331.6) na Shule ya Msingi Mbangamao (Shilingi milioni 53.1).

Miradi mingine ni shule ya Msingi Luhangai (Shilingi milioni 53.1), Shule ya Msingi Makatani (Shilingi milioni 53), Shule ya Msingi Kikolo (Shilingi milioni 53.1) na Zahanati ya Makatani (Shilingi milioni 17).

Bi. Amina alisema atashirikiana na wakuu wa idara na vitengo mbalimbali katika Halmashauri hiyo kufuatilia kwa ukaribu utekelezaji wa miradi ya maendeleo ili ikamilike kwa wakati na ubora mkubwa.

“Tutahakikisha tunafuatilia maendeleo ya miradi kwa ukaribu ili ikamilike kwa wakati,” alisisitiza Bi. Amina.

Kwa sasa, miradi iliyo mingi imekamilika kwa zaidi ya asilimia 80.