MKURUGENZI WA HALMASHAURI YA MJI WA MBINGA ATEMBELEA MIRADI YENYE THAMANI YA SHILINGI BILIONI 1.765

Tarehe ya kuwekwa: September 27th, 2023

Na Alex Nelson Malanga

Afisa Habari---MTC

Mbinga.  Mkurugenzi wa Halmashauri ya Mji wa Mbinga (MTC) mwishoni mwa wiki (Septemba 23, 2023) alikagua miradi tisa yenye thamani ya shilingi bilioni 1.765 inayotekelezwa na Halmashauri hiyo.

Miradi hiyo pamoja na thamani yake kwenye mabano ni ujenzi wa shule ya sekondari katika kata ya Matarawe (Shilingi milioni 560.6), kituo cha afya cha Mbangamao (Shilingi milioni 500) na ujenzi wa shule ya Msingi Kipika katika kata ya Matarawe (Shilingi milioni 331.6).  

Miradi mingine ni ujenzi wa nyumba mbili za walimu katika shule ya sekondari Lusonga (Shilingi milioni 95), Ujenzi wa vyumba viwili vya madarasa na matundu matatu ya vyoo katika Shule ya Msingi Mbangamao (Shilingi milioni 53.1) na ujenzi wa vyumba viwili vya madarasa na matundu matatu ya vyoo katika shule ya msingi Luhangai (Shilingi milioni 53.1).

Pia Mkurugenzi akiambatana na wakuu wa idara na vitengo alitembelea mradi wa Shule ya Msingi Makatani (Shilingi milioni 53.1) unaohusisha ujenzi wa madarasa mawili na matundu matatu ya vyoo, ujenzi wa madarasa mawili na matundu matatu ya vyoo katika Shule ya Msingi Tanga (Shilingi milioni 53.1)  pamoja na ujenzi wa madarasa  mawili ya elimu ya awali na matundu sita ya vyoo katika Shule ya Msingi Kiwanjani (Shilingi milioni 66.3).    

Imekuwa  ni utamaduni wa Mkurugenzi kuongozana na wasaidizi wake kwenda kwenye miradi ili kujua maendeleo ya utekelezaji hatua kwa hatua.    

Kwa lugha nyingine unaweza kusema kwa Halmashauri ya Mji wa Mbinga ni ‘Kazi iendelee’ kwa kasi na viwango vya hali ya juu.  

Akizungumza wakati wa ziara Bi. Amina aliwataka mafundi kuendelea kufanya kazi kwa kasi na ubora wa hali ya juu.

“Mama Samia (Rais wa Tanzania Mheshimiwa Dkt. Samia Suluhu Hassan) anatupenda sana na ndio maana katuletea miradi kwa hiyo tusimuangushe,”alisema Bi. Amina.

Mhandisi wa Halmashauri ya Mji wa Mbinga Bw. Peter Lupembe aliwahi kunukuliwa akisema mradi wa Sequip wa shule ya sekondari katika kata ya Matarawe  unahusisha ujenzi wa jengo la madarasa nane, maabara tatu, Maktaba, Jengo la Tehama, matundu kumi ya vyoo, kichomea taka na jengo la utawala.

Mradi huo ambao uko kwenye hatua ya msingi, pia unahusisha ujenzi wa jengo la Tehama, maktaba, matundu 10 ya vyoo na kichomea taka.

Kwa upande mwingine utekelezaji wa mradi wa kituo cha afya cha Mbangamao uko kwenye hatua ya mwisho ya utekekelezaji.

Mradi huu unahusisha ujenzi wa jengo la wazazi na chumba cha upasuaji, maabara, jengo la kufulia, wodi, njia za kuunganisha wodi moja na nyingine, jengo la wagonjwa wa nje (OPD) na ujenzi wa kichomea taka.

Wakati kwa upande wake mradi wa Shule ya Msingi Kipika unahusisha ujenzi wa madarasa 9, matundu 18 ya vyoo na jengo la utawala, mradi wa  Shule ya Msingi Mbangamao unahusisha ujenzi wa vyumba viwili vya madarasa na matundu matatu ya vyoo.