MKUU WA WILAYA YA MBINGA ATAKA SHULE ZITUMIE UNGA ULIOONGEZWA VIRUTUBISHO

Tarehe ya kuwekwa: October 25th, 2023

Na Rahma Mwaka & Elizabeth Newa

Mbinga. Mkuu wa Wilaya ya Mbinga Mhe. Aziza Mangosongo amewataka maafisa lishe na watendaji wa kata kuhakikisha shule zinapata unga wenye virutubisho ili kutokomeza udumavu na utapiamlo.

Mkuu wa Wilaya alitoa agizo hilo ofisini kwake wakati wa kikao cha lishe  cha robo ya kwanza ya muhula wa pili (Julai - Septemba) kilichofanyika mwishoni mwa wiki jana. 

Mhe. Aziza aliwataka maafisa lishe na watendaji wa kata kuwaelimisha wamiliki wa mashine za kusaga nafaka kufunga mashine za kuongeza virutubisho ili kuongeza ubora wa viini lishe katika unga wa sembe.

"Hakikisheni shule zinakuwa na bustani za mbogamboga na miti ya matunda inapandwa ili wanafunzi wapate mlo kamili," aliagiza Mhe. Aziza.

Pia aliwasisitiza maafisa lishe kufuatilia utunzaji wa chakula na kuelekeza namna bora ya utunzaji katika shule zote ili kiweze kutumika kwa muda uliopangwa.

Aliwaagiza watendaji wa kata kuhakikisha wazazi wanachangia chakula shuleni ili watoto wapate chakula kwa kuwa kitawasaidia kuwa na utulivu katika masomo na kuimarisha afya zao.

Mwakilishi  wa Kampuni ya SANKU Bw. Christian Seme alisema Kampuni hiyo inatoa virutubisho, mifuko na kufunga mashine za kuongeza virutubisho bure katika taasisi za serikali.

SANKU ni mtoa huduma katika programu ya kuchanganya virutubishi kwenye unga wa mahindi.

Bw Seme aliongeza kuwa hadi sasa wamefunga mashine tatu katika Wilaya ya Mbinga ambazo zipo Mkako, Kigonsera na Kinyero.

Afisa lishe wa Halmashauri ya Mji wa Mbinga Martin Kwimba aliwasilisha tathimini ya lishe kwa robo ya kwanza ambapo alibainisha kuwa katika maonesho ya nanenane  watu waliofikiwa ni  121, ambapo waliokuwa na hali nzuri ya lishe  ni 70,  uzito uliozidi 40 na uzito uliokithiri 11.

Pia, aliongeza, katika mnada wa sabasaba watu  waliofikiwa ni 102 waliokuwa na hali nzuri ya lishe 66, uzito uliozidi 24 na uzito uliokithiri 10.