MKUU WA WILAYA YA MBINGA AZINDUA KAMPENI YA USAFI IJULIKANAYO KAMA MANGOSONGO OPARESHENI SAFISHA MJI: MBINGA ING'AE

Tarehe ya kuwekwa: September 4th, 2023

Na Alex Nelson Malanga

Afisa Habari- MTC

Mbinga. Mkuu wa Wilaya ya Mbinga Mhe. Aziza Mangosongo leo Septemba 4, 2023 amezindua kampeni ya usafi ya wiki moja yenye lengo la kuifanya Mbinga kuwa safi na yenye mvuto zaidi machoni pa watu.

Uzinduzi wa kampeni itakayotamatishwa Septemba 10, ulifanywa katika maeneo ya Soko la Mtumba, Soko Kuu, Stendi kuu, Manzese, Machinjio na Viunga vya bustani vilivyopo barabara kuu ya Songea- Mbamba Bay.

Kama unadhani kampeni hii inayokwenda kwa jina la ‘Mangosongo Oparesheni Safisha Mji: Mbinga ing’ae’, itaishia kwenye maeneo hayo, unakosea sana.

Kampeni iliyobuniwa na Mhe. Mkuu wa Wilaya itagusa kata zote za Wilaya ya Mbinga na viunga vyake na pia zoezi la usafi litakuwa endelevu.

Akizindua kampeni hiyo Mhe. Aziza aliwataka watendaji wa kata na mitaa kufanya kazi kwa bidii bila kusukumwa.

Pamoja na Mhe. Mkuu wa Wilaya, viongozi wengine waliohudhuria ufunguzi wa kampeni hiyo kabambe ya usafi ni Katibu Tawala wa Wilaya ya Mbinga Bi. Pendo Ndumbaro, Mwenyekiti wa Halmashauri ya Mji wa Mbinga (MTC) Mhe. Kelvin Mapunda na Mkurugenzi wa Halmashauri hiyo Bi. Amina Seif.

 Wengine ni maafisa Afya wa Wilaya, baadhi ya wakuu wa idara wa Halmashauri ya Mji wa Mbinga na Maafisa watendaji wa kata na vijiji.  

Mhe. Aziza alionesha kukerwa na kulegalega kwa kampeni ya usafi ya kila Jumamosi ya mwisho wa mwezi.

“Hii haikubaliki. Tunataka Mbinga ambayo ni safi,” alisema Mhe. Aziza.

 Aliongeza kwa kusema: “Watendaji wa Kata na Mitaa lazima muache ‘legacy’(alama) na legacy huwa haijifichi.”

“Lazima mjiulize siku ukihama kutoka mtaa au kata moja kwenda nyingine utakumbukwa kwa lipi?

Alisema kwa viongozi hao kupata mafanikio makubwa na hivyo kuacha alama kwa vizazi vijavyo, wanapaswa kuandaa mpango kazi na kuhakikisha wanaufanyia kazi.

Kwa upande wake Mwenyekiti wa Halmashauri ya Mji wa Mbinga Mhe. Mapunda alimshukuru Mkuu wa Wilaya kwa mawazo yake mazuri ya kusaidia Halmashauri.

Alieleza haja ya kuifanya Mbinga kuwa kioo cha jamii linapokuja suala la usafi.

“Watendaji lazima tutekeleze yale tunayoelekezwa na Mheshimiwa Mkuu wa Wilaya,” alisema Mhe. Mapunda.

Mkurugenzi wa Halmashauri ya Mji wa Mbinga Bi. Amina, kwa upande wake, aliwataka watendaji wa Mitaa na Kata kusimamia kikamilifu zoezi la usafi kwenye maeneo yao.

“Usafi unaofanyika wiki hii tunataka uwe endelevu kwani tunataka Mbinga yetu ing’ae ,” alisema Bi. Amina huku akimshukuru Mheshimiwa Mkuu wa Wilaya kwa kuja na kampeni hii murua.    

Kwa upande wake Afisa Afya wa Halmashauri ya Mji wa Mbinga Bw. Felix Matembo alisema atafanya kila liwezekanalo kuhakikisha Mji wa Mbinga unang’aa.

Alisema ili kufanikisha ndoto ya kuwa na Mbinga itakayomfanya mtu asichoke kuitazama, atafanya kazi kwa kushirikiana na watendaji wa mitaa na kata.  

“Kampeni hii itachochea ufanisi katika usafi wa mazingira,” alisema Bw. Matembo.

Ikiwa ni ishara ya kuyafanya mazingira kuwa na mvuto zaidi siku za usoni, zoezi la usafi siku ya kwanza ya kampeni lilienda sambamba na upandaji miti katika viunga vya bustani vilivyopo barabara kuu ya Songea- Mbamba Bay.

Mhe. Mkuu wa Wilaya, Katibu Tawala wa Wilaya na Mkurugenzi wa Halmashauri ya Mji wa Mbinga waliungana na wadau wengine wa mazingira katika zoezi la upandaji miti.