MRADI WA HOSPITALI MBINGA MJI KUKAMILIKA AGOSTI 13

Tarehe ya kuwekwa: May 29th, 2024

Na Alex Nelson Malanga

Afisa Habari-----Mbinga Mji

Mbinga. Mradi wa Hospitali ya Halmashauri ya Mji wa Mbinga unaohusisha ujenzi wa jengo la wagonjwa wa nje, upasuaji na maabara  unatarajia kukamilika Agosti 13 mwaka huu, shukrani kwa serikali ya awamu ya sita chini ya uongozi wa Mhe. Rais. Dkt. Samia Suluhu Hassan.

Akizungumza leo wakati wa ziara ya Mkuu wa Mkoa wa Ruvuma Mhe. Kanali Ahmed Abass Ahmed, Mkurugenzi wa Halmashauri ya Mji wa Mbinga Bi. Amina Seif alisema kukamilika kwa mradi huo unaogharimu shilingi milioni 900, fedha kutoka serikali kuu, kutaleta mapinduzi chanya kwenye utoaji wa huduma za afya.

“Kukamilika kwa mradi huu, ambao ujenzi wake ulianza Februari 12, 2024, kutapelekea hospitali yetu kuwa na miundombinu toshelezi kwa watoa huduma na wagonjwa,” alisema Bi. Amina siku ya Jumatano, Mei 29, 2024 wakati wa ziara ya mkuu wa mkoa katika mradi huo.

Aliongeza: “Mara baada ya kukamilika kwa mradi huu, tutaweza kupanua wigo wa utoaji huduma za afya kwa makundi maalumu, kuanzisha huduma mpya za kiuchunguzi na kuimarisha utekelezaji wa  miongozo ya kuzuia maambukizi maeneo ya kazi.”

Kwa upande wake Mhe. Mkuu wa Mkoa alisema: “Sisi kama serikali tumedhamiria kutoa huduma bora kwa wananchi. Tunataka watanzania wapate huduma bila manung’uniko.”