MRADI WA SHULE YA MSINGI MATENGO ‘KIPIKA’ WAZIKOSHA KAMATI ZA FEDHA NA ELIMU

Tarehe ya kuwekwa: January 25th, 2024

Na Alex Nelson Malanga

Afisa Habari…Mbinga TC

Mbinga. Wajumbe wa Kamati za Fedha na Elimu kutoka Halmashauri ya Mji wa Mbinga siku ya Jumanne, Januari 23, 2024 walitembelea miradi mitano yenye thamani ya Shilingi bilioni 1.1 inayotekelezwa katika Halmashauri hiyo.

Wajumbe hao wakiongozwa na Mwenyekiti wa Halmashauri ya Mji wa Mbinga Mhe. Kelvin Mapunda walionekana kukoshwa na ubora wa miradi hiyo huku mradi wa shule ya Msingi Matengo almaarufu Kipika ukionekana kukonga zaidi nyoyo za wajumbe hao.  

Nyuso zao zikiwa zimefunikwa na tabasamu pana, wajumbe wa kamati waliumwagia sifa kemkem mradi wa Matengo ‘Kipika’ uliogharimu kiasi cha Shilingi milioni 331.6 huku wakisema una mvuto wa aina yake.

Shule ya Msingi Matengo yenye madarasa tisa, matundu 16 ya vyoo na jengo la utawala, ilifunguliwa rasmi Januari 8, 2024 na Mkuu wa Wilaya ya Mbinga Mhe. Aziza Mangosongo.

Wajumbe wa kamati pia walivutiwa na ubora wa miradi mingine pamoja na gharama zake kwenye mabano; Shule ya Sekondari Dkt. Philip Mpango (Shilingi milioni 560.6) iliyofunguliwa Januari 8, 2024 na ujenzi wa nyumba ya walimu wawili wa shule ya sekondari Lusonga (Shilingi milioni 95).

Kamati hizo mbili pia zilitembelea miradi ya Shule ya Msingi Kiwanjani (Shilingi milioni 66.3) na Shule ya Msingi Tanga (Shilingi milioni 53.1).

Sura yake ikiwa inajieleza kila kitu, Diwani wa Kata ya Mateka Mhe. Method Ndunguru alisema mradi wa Kipika ni wa mfano na kwamba hutoa fursa kwa wengine kuiga.

Huku akielekeza macho yake kwa Diwani wa Kata ya Matarawe Mhe. Kelvin Mapunda, Mhe. Ndunguru alisema: “Shule yako ni shule ya mfano. Inatoa Taswira ya hapa Mjini.”

Diwani wa Kata ya Lusonga Mhe. Magreth Ngongi aliusifia mradi wa Kipika huku akimpongeza diwani wa kata hiyo Mhe. Mapunda kwa usimamizi uliotukuka.

“Muonekano wa shule hii unamvutia kila mzazi kumleta mwanaye,” alisema Mhe. Magreth.

Diwani wa Kata ya Luhuwiko Mhe. David Mapunda alisema: “nimeridhishwa na ubora wa majengo.”

Mwenyekiti wa Halmashauri, kwa upande wake, alimshukuru Mhe. Rais Dkt. Samia Suluhu Hassan kwa kuipatia Halmashauri fedha kwaajili ya miradi ya maendeleo.

“Rais wetu anawajali wananchi na ndio maana anafanya kila awezalo kusogeza huduma za kijamii karibu yao,” alisema Mhe. Mapunda.

Kwa upande mwingine, Mhe. Mapunda alimpongeza Mkurugenzi wa Halmashauri ya Mji wa Mbinga Bi. Amina Seif kwa kazi nzuri ya kusimamia miradi ya maendeleo.