MWENGE KUTEMBELEA MIRADI 72 YA SH46 BILIONI

Tarehe ya kuwekwa: June 8th, 2024

Na Alex Nelson Malanga

Afisa Habari---Mbinga Mji

Tunduru. Mwenge wa Uhuru mwaka 2024 unatarajia kutembelea miradi 72 yenye thamani ya shilingi bilioni 46.1 mkoani Ruvuma, imebainishwa.

Kati ya miradi hiyo, 17 itafunguliwa, 13 itawekewa jiwe la msingi na 42 itakaguliwa, kwa mujibu wa Mkuu wa Mkoa wa Ruvuma Mhe. Kanali Ahmed Abbas Ahmed.

Mkuu huyo wa mkoa aliyasema hayo Juni 8, 2024 katika kijiji cha Sauti Moja, wilayani Tunduru wakati wa mapokezi ya Mwenge wa Uhuru.

Mhe. Ahmed alikabidhiwa Mwenge huo na Mkuu wa Mkoa wa Mtwara Mhe. Kanali Patrick Sawala Jumamosi asubuhi.  

Ukiwa Mkoani Ruvuma, Mwenge utakimbizwa kwenye Halmashauri zote nane za mkoa huo mpaka Juni 15, kabla ya kukabidhiwa kwa Mkoa wa Njombe siku inayofuata.

Katika Mkoa wa Ruvuma Mwenge utakimbizwa umbali wa kilometa 1289.5 na  timu ya watu sita kwa ngazi ya Taifa, ikiongozwa na Bw. Godfrey Eliakim Mnzava.  

“Karibuni sana mkoa wa Ruvuma, tutawatunza, tutawajali na tutawakarimu ili muweze kutekeleza kikamilifu jukumu hili muhimu kwa Taifa letu,” Mhe. Kanali Ahmed aliwaambia wakimbiza Mwenge kitaifa.