MWENYEKITI WA MBINGA MJI ATOA SIKU 10 MIRADI YA BAKAA IKAMILIKE

Tarehe ya kuwekwa: January 30th, 2024

Na Alex Nelson Malanga

Afisa Habari…Mbinga TC

Mbinga. Mwenyekiti wa Halmashauri ya Mji wa Mbinga Mhe. Kelvin Mapunda ametoa siku 10 kwa mafundi wanaotekeleza miradi ya bakaa kukamilisha kazi yao na kukabidhi kwa Halmashauri.

Agizo hilo lilitolewa jana, Januari 29, 2024 wakati wa ziara yake ya kukagua miradi sita ya bakaa yenye thamani ya jumla ya Shilingi milioni 232.

“Ninatoa siku 10 kuanzia kesho (leo---Januari 30) miradi yote ya bakaa ambayo haijakamilika, ikamilike,” alisema Mh. Mapunda.

Tafsiri yake ni kwamba miradi yote inatakiwa ikamilike kabla au ifikapo Februari 8 mwaka huu.

Miradi ambayo Mh. Mapunda alitembelea ni ujenzi wa madarasa matatu katika shule ya Msingi Mbinga (milioni 60), madarasa mawili katika shule ya Msingi Mateka (milioni 40) na madarasa mawili katika Shule ya Msingi Myangayanga (milioni 40).

Miradi mingine ni  ujenzi wa Shule mpya ya msingi ‘Lusewa’---madarasa mawili na ofisi moja (milioni 26), madarasa mawili katika shule ya msingi Beruma, kata ya Betherehemu (milioni 26) na madarasa mawili katika Shule ya Msingi Utiri (Milioni 40).  

“Serikali ya awamu ya Sita chini ya Rais shupavu Dkt. Samia Suluhu Hassan ilitoa pesa kwaajili ya kutekeleza miradi hii. Hivyo basi, tunapaswa kutekeleza miradi hii kwa wakati na ubora wa hali ya juu,” alisema Mh. Mapunda.

Alimpongeza Mhe. Rais kwa jitihada zake za kuwasogezea wananchi huduma za kijamii.

Kwa upande wake Diwani wa Kata ya Betherehemu alimshukuru Mhe. Mwenyekiti: “Asante kwa namna mnavyotubeba. Asante kwa miradi mliyotuletea.”