NEC YAKARIBISHA ASASI ZA KIRAIA, TAASISI KUTAZAMA UCHAGUZI MDOGO WA MADIWANI

Tarehe ya kuwekwa: February 20th, 2024

Na Alex Nelson Malanga

Afisa Habari…Mbinga TC

Mbinga.  Tume ya Taifa ya Uchaguzi (NEC) inakaribisha maombi kutoka Asasi za Kiraia na Taasisi nyingine zenye nia ya kutazama uchaguzi mdogo wa madiwani katika kata 23 za Tanzania Bara, ikiwemo  Utiri iliyopo katika Halmashauri ya Mji wa Mbinga.

Uchaguzi mdogo katika kata hizo 23 uliosababishwa na sababu tofauti tofauti, utafanyika Machi 20, 2024, kwa mujibu wa NEC.

Tume imesema kupitia taarifa yake kwa umma kuwa waombaji wa nafasi ya kutazama uchaguzi walipaswa kuwasilisha maombi kupitia https://oms.nec.go.tz kuanzia Februari 15 hadi 20, 2024.

Taarifa hiyo iliyosainiwa na Mkurugenzi wa Uchaguzi NEC Bw. Kailima, R.K inaendelea kusema kuwa barua ya maombi pamoja na mambo mengine, inatakiwa kuainisha anuani ya taasisi au asasi husika.

Pia, inapaswa kuonesha mahali ambapo taasisi au asasi husika inafanyia kazi zake, pamoja na shughuli zinazofanywa kwa mujibu wa hati ya usajili.

Sanjari na mahitaji hayo, barua inapaswa kuainisha maeneo ambayo taasisi au asasi husika inapenda kwenda kutazama uchaguzi, idadi ya watu watakao tumiwa kwenye zoezi hilo pamoja na majina na taarifa zao binafsi.