NIDA YAFIKIA ASILIMIA 83.2 YA LENGO LA USAJILI MBINGA

Tarehe ya kuwekwa: December 23rd, 2023

Na Alex Nelson Malanga

Afisa Habari---MTC

Mbinga. Mamlaka ya Vitambulisho vya Taifa (NIDA) Wilaya ya Mbinga imefikia asilimia 83.2 ya malengo ya usajili wa watu 223,657.

Hayo yalisemwa siku ya Alhamis ya Disemba 21, 2023 wakati wa Uzinduzi wa zoezi la siku 14 la Ugawaji Vitambulisho vya Taifa kwa Wilaya ya Mbinga, katika tukio ambalo mgeni rasmi alikuwa Mkuu wa Wilaya ya Mbinga Bi. Aziza Mangosongo.

Akizungumza wakati wa uzinduzi, Afisa Usajili Mwandamizi wa NIDA Bw. Ibrahim Liduke alisema hadi Novemba 30, 2023 idadi ya watu waliosajiliwa ilikuwa 185,986.

“Hii ni sawa na asilimia 83.2 ya lengo la kusajili watu 223,657,” alisema Bw.Liduke.

Alisema kwa sasa watagawa vitambulisho vya Taifa 131,181 ambavyo vimezalishwa hivi karibuni kwa Wananchi na Wakazi wa Wilaya ya Mbinga.

Hii itapelekea kufikisha idadi ya Wananchi 164,275 watakaokuwa na vitambulisho vya Taifa sawa na asilimia 88.3 ya wananchi wote waliojiandikisha, kwa mujibu wa Bw. Liduke.

Zoezi hili la ugawaji wa vitambulisho litafanyika kwa utaratibu wa kuvisambaza hadi ngazi ya kata na kukabidhiwa Mtendaji Kata kabla ya kuvikabidhi kwa watendaji wa Mitaa na Vijiji ambao ndio watakuwa na jukumu la kuvigawa kwa wananchi.

Kwa upande wake Mkuu wa Wilaya Mhe. Aziza aliwataka watendaji kata wawahamasishe wananchi kujitokeza kwa wingi kufuata vitambulisho vyao.

“Ugawaji wa vitambulisho utakata kiu ya muda mrefu ya wananchi wa Wilaya ya Mbinga waliokuwa wakisubiri vitambulisho vyao kwa muda mrefu,” alisema Mhe. Aziza.

Mbunge wa Mbinga Mjini Mhe. Jonas Mbunda alimpongeza Rais wa Jamhuri ya Muungano wa Tanzania kwa kuweka sera nzuri kuhakikisha kila mwananchi anapata kitambulisho.

“Tunamshukuru Mhe. Rais kwa kutoa zaidi ya bilioni 42 kwaajili ya uzalishaji wa vitambulisho vya Taifa (Milioni 13),” alisema Mh. Mbunda.

Wengine waliohudhuria katika tukio la uzinduzi ni Mkurugenzi wa Halmashauri ya Mji wa Mbinga Bi. Amina Seif na wakuu wa Idara na vitengo.