SHULE YA MSINGI LAZI YASAINI MKATABA WA UFADHILI WA CHAKULA NA JESUS GRACE MISSION KUTOKA KOREA KUSINI

Tarehe ya kuwekwa: September 27th, 2023

Na Elizabeth Newa & Rahma Mwaka

Mbinga.  Jesus Grace  Mission chini ya  Bw. Jong Jin Kim  kutoka Korea Kusini imesaini mkataba wa mwaka mmoja wa ufadhili wa chakula katika shule ya msingi Lazi iliyopo katika Kijiji cha Lazi ndani ya Halmashauri ya Mji Mbinga.

Ufadhili huo ulioanza septemba 2023 na unaotarajiwa kumalizika septemba 2024, umeanza kwa kutoa unga wa sembe wenye virutubisho kiasi cha mifuko 100 yenye ujazo wa kilogramu 25 kila mfuko.

Bw. Kim alisema amekuwa akiwaza namna ya kuwasaidia wanafunzi wa shule hiyo na kuamua  kutoa unga wa mahindi wenye virutubisho  kiasi cha wastani wa kilo 70 kwa siku, na kwamba ufadhili huo ameutoa kwa  kushirikiana na marafiki, ndugu na familia yake.

"Ninatamani wanafunzi wa shule hii wawe na afya nzuri, ninaahidi kutoa huduma hii zaidi iwapo unga huo utatumika vizuri na ikiwa tofauti nitasitisha zoezi hili" Alisema Bw. Kim

Katibu tawala wa Wilaya ya Mbinga Pendo Daniel aliyekuwa mgeni rasmi katika hafla hiyo ya utiaji saini  amewashukuru Jesus Grace Mission kwa kuamua kugharamia chakula katika shule hiyo kwa mwaka mmoja.

"Mfadhili huyu ametuonyesha njia baada ya kutoa chakula hiki, hivyo ninawaomba wazazi kujipanga ili mwaka unaofuata tuweze kuwalisha watoto wetu chakula chetu wenyewe" Alisema Bi. Pendo

Mkurugenzi wa Halmashauri ya Mji wa Mbinga  Bi. Amina Seif  aliwapongeza na kuwashukuru wafadhili  hao kwa ufadhili wa chakula  katika shule hiyo.

Nae Afisa Elimu Msingi wa Halmashauri ya Mji wa Mbinga Fred Fandey aliwashukuru wafadhili hao na kusema chakula hicho chenye virutubisho kitawapa wanafunzi afya nzuri na kuwa wenye uwezo wa kiakili.