UZALISHAJI WA MAZAO YA CHAKULA NA BIASHARA WAONGEZEKA KWA ASILIMIA 7.9

Tarehe ya kuwekwa: October 24th, 2023

Na Erasto George

Mbinga. Uzalishaji wa mazao ya chakula na biashara katika Halmashauri ya Mji wa Mbinga (MTC) uliongezeka kwa asilimia 7.9 katika msimu wa 2022/23 ikilinganishwa na mwaka wa nyuma yake.

Siku ya Oktoba 24, 2023 Afisa Kilimo na Msimamizi wa Pembejeo wa Halmashauri ya Mji wa Mbinga Bw. Andrew Chiwinga alisema ongezeko la uzalishaji lilitokana na mfumo mzuri wa upatikanaji wa mbolea za ruzuku.

Bw. Chiwinga alisema kuwa katika msimu wa 2022/23 uzalishaji uliongeza kufikia tani 80,900 ikilinganishwa na tani 75,000 zilizozalishwa mwaka 2021/22.

"Mfumo wa mbolea za ruzuku umewasaidia wakulima kupata mbolea kwa bei nafuu na kwa wakati na hivyo kuongeza tija katika kilimo,” alisisitiza.

Bw.Chiwinga alisema kwa msimu uliopita walipokea mbolea tani 15,613 ikilinganishwa na matarajio ya tani 10,500.

Aidha, aliongeza kuwa ongezeko hilo lilitokana na wilaya nyingine za Mbinga vijijini na Nyasa kuchukua mbolea kutoka Mbinga Mji.

Pia Bw. Chiwinga alisema kwa Halmashauri ya Mji wa  Mbinga, mahitaji yao  ya mbolea yanakadiriwa kuwa tani 12,500 kwa mwaka 2023/24 ikilinganishwa na tani 10,500.  

Hii, alieleza, inatokana na kuongezeka kwa wakulima wanaojisajili katika mfumo wa mbolea ya ruzuku.

Bw. Chiwinga alisema msimu uliopita waliweza kuwasajili na kuwaingiza kwenye mfumo wakulima 21,099  na kuwapatia namba za kununulia mbolea ya ruzuku.

Ili msimu huu wa 2023/24 wakulima wengi zaidi wanufaike na mbolea ya ruzuku aliwataka kwenda katika maeneo waliojiandikisha kuhakiki taarifa zao.

Bw. Chiwinga alisema mbali  na uhakiki wa taarifa, pia usajili mpya kwa wale ambao hawakujiandikisha msimu uliopita unaendelea katika kata na vijiji vya Halmashauri ya Mji wa Mbinga.

Mkulima katika Halmashauri ya Mji wa Mbinga Bw. Alex Saligo alisema hivi sasa  mbolea za ruzuku zinawasaidia sana wakulima tofauti na zamani ambapo kila muuzaji alikuwa anapanga bei yake.

Mkulima mwingine Bw. Erick Komba alisema baada ya serikali kuanza kutoa mbolea za ruzuku wameondokana na usumbufu kwa kuwa zinauzwa kwa bei elekezi.