UZALISHAJI WA PARACHICHI WAPAA KWA ASILIMIA 400

Tarehe ya kuwekwa: May 16th, 2024

Na Alex Nelson Malanga

Afisa Habari----Mbinga Mji

Mbinga. Uzalishaji wa zao la parachichi katika Halmashauri ya Mji wa Mbinga umepaa kwa asilimia 400 ndani ya miaka mitatu, taarifa rasmi ya serikali inaonesha.

Mkuu wa Idara ya Kilimo, Mifugo na Uvuvi katika Halmashauri ya Mji wa Mbinga Bw. Enock Ndunguru alisema siku ya Alhamisi, Mei 16 mwaka huu kuwa uzalishaji wa zao hilo uliongezeka mpaka kufikia tani 40 katika msimu wa mavuno wa mwaka 2023.

Hili, alifafanua, ni ongezeko la tani 32 ikilinganishwa na tani nane zilizozalishwa mwaka 2021.

Bw. Ndunguru alisema ongezeko hilo lilichagizwa na mazingira rafiki yaliyotengenezwa na serikali kwa lengo la kuvutia wakulima kujikita zaidi katika kilimo cha parachichi.

“Eneo la uzalishaji wa zao la parachichi katika Halmashauri ya Mji wa Mbinga limeongezeka kutoka hekari 80 mwaka 2021 hadi kufikia hekari 182 za sasa, hii inatia moyo kwa hakika,” alisema.

Bw. Ndunguru alihitimisha kwa kusema kuwa mbali ya kuwa chanzo cha kipato, parachichi ni rafiki wa mazingira.