VYAMA VYA USHIRIKA MBINGA MJI KULIPA ASILIMIA 3 YA BEI KWA KILA KILO MOJA YA KAHAWA

Tarehe ya kuwekwa: October 17th, 2023

Na Rahma Mwaka & Elizabeth Newa

Mbinga. Vyama vya  Ushirika  wa Kilimo na Masoko ya kahawa (AMCOS) katika Halmashauri ya Mji wa Mbinga vimekubaliana kulipa ushuru wa asilimia 3 ya bei kwa kila kilo moja ya kahawa kwa kuzingatia bei ya mnada wa siku husika.

Makubaliano hayo yalifikiwa katika kikao kilichofanyika katika Ukumbi wa Mikutano  wa Oddo Mwisho jana Oktoba 16, 2023 na kuhudhuriwa na wajumbe kutoka vyama vyote vya ushirika vilivyopo katika Halmashauri ya Mji wa Mbinga.

Mkuu wa idara ya Kilimo, Mifugo na Uvuvi Bw. Enock Ndunguru alisema msimu uliopita wakulima walikuwa wakilipa ushuru wa shilingi 150 kwa kilo ya kahawa bila kujali kiwango cha bei ambacho mkulima amekitumia katika mauzo yake.

"Kwa sasa mbali na asilimia 3, wakulima huchangia shilingi 20 kwa kila kilo moja ya kahawa, kiasi ambacho huelekezwa katika shughuli za maendeleo katika jamii," alieleza Bw. Ndunguru.

Makamu Mwenyekiti wa Halmashauri ya Mji wa Mbinga Mhe. Alex Andoya aliwapongeza wakulima wa kahawa kwa kuwa wana thamani kubwa katika Halmashauri ya Mji wa Mbinga.

Alisisitiza haja ya kujenga mahusiano mazuri kati ya Halmashauri na wakulima ili kuisaidia serikali kupata mapato kupitia kahawa.

"Wataalamu hakikisheni mnawasaidia wakulima kuilinda kahawa ambayo inapatikana katika Halmashauri," aliagiza Mhe. Andoya.

Afisa Mapato wa Halmashauri ya Mji wa Mbinga Denis Muli alisema kahawa imekuwa na mchango mkubwa katika mapato ya Halmashauri.

Bw. Muli aliwataka viongozi wa AMCOS zote kuhakikisha wanalipia na kupata leseni za biashara na maghala ili kuepuka faini zinazoweza kujitokeza kama hawajafanya hivyo.

Mkuu wa idara ya Ardhi Bw. John Rikanga alivishauri vyama vya Ushirika wa Kilimo na Masoko  ya kahawa (AMCOS ) kuhakikisha vipande vya ardhi walivyonavyo vinapimwa na kuvimiliki kisheria.

Bw. Rikanga alisema kwa kufanya hivyo wataepuka migogoro ya mipaka, wataweza  kupandisha thamani ya ardhi waliyonayo na  kupitia nyaraka za umiliki wa ardhi zitawawezesha kukopa katika taasisi mbalimbali za kifedha.