WAKAZI WA MBINGA WATAKIWA KUWA WAZALENDO

Tarehe ya kuwekwa: December 12th, 2023

Na Alex Nelson Malanga

Afisa Habari----MTC

Mbinga.  Viongozi mbalimbali kutoka Wilaya ya Mbinga wamewataka wakazi wa wilaya hiyo kuwa wazalendo kwa maslahi mapana ya Taifa la Tanzania.

Wito huo ulitolewa wakati wa kilele cha maadhimisho ya sherehe za miaka 62 ya Uhuru wa Tanzania Bara zilizofanyika Jumamosi ya Disemba 9, 2023 katika Ukumbi wa Mkapa uliopo katika Shule ya Sekondari Kigonsera, Wilayani Mbinga.

Akimwakilisha Mkuu wa Wilaya ya Mbinga katika sherehe hizo, Kaimu Afisa Tawala wa Wilaya Bw. Karim Mzee alisema kila mkazi wa Mbinga anapaswa kuwa mzalendo kwa Taifa la Tanzania.

“ Tukifanya hivyo Tanzania itapiga hatua kubwa ya maendeleo kwa kuwa kila mmoja wetu atakuwa mlinzi wa Taifa letu,” alisema Bw. Mzee wakati wa maadhimisho yaliyobeba kauli mbiu: Umoja na Mshikamano ni chachu ya maendeleo ya Taifa letu.

Aliongeza: “Sisi hatuna ‘option’ (chaguo), Tanzania ndio mama, Tanzania ndio baba. Hatuna pengine pakwenda…kwa muktadha huo, lazima tuilinde na kutetea nchi yetu.”

Kwa upande wake Mwenyekiti wa Halmashauri ya Mji wa Mbinga Mhe. Kelvin Mapunda alisema suala la uzalendo linapaswa kwenda sanjari na kuwa na kizazi cha vijana wasomi.

 Alisema ili taifa liwe na vijana wenye tija kwa maendeleo, wanafunzi wa shule ya Sekondari Kigonsera hawanabudi kusoma kwa bidii.

“Msimuache elimu aende zake. Someni kwa bidii ili mfaidike na dunia ijayo,” Mhe. Mapunda aliwaasa.  

Naye Mkurugenzi wa Halmashauri ya Mji wa Mbinga Bi. Amina Seif aliwataka vijana kuwa wazalendo kwa manufaa mapana ya Taifa.

“Vijana wa Tanzania mnapaswa kushikamana, kuwa wazalendo na wasikivu. Lazima muwe vijana bora kwa Taifa,” alisisitiza Bi. Amina.

Kamanda wa Takukuru Wilaya ya Mbinga Frederick Msae aliwataka wakazi wa wilaya hiyo kujitolea maisha yao kwaajili ya Taifa la Tanzania.

“Ni vizuri tukawa wazalendo. Ni vizuri tukajitolea linapokuja suala la ujenzi wa Taifa letu,” alisema  Kamanda Msae.

Aliongeza: “Katiba inatutaka, na si kutuomba, kuwa wazalendo. Kwahiyo yeyote ambaye siyo mzalendo kimsingi anavunja katiba yetu.”

Alikemea wanaotumia mali za umma kwa manufaa binafsi na kusema kuwa huo sio uzalendo.

“Tusiwafumbie macho watumishi wa umma wanaojihusisha na vitendo vya ubadhilifu wa mali za umma ikiwa ni pamoja na vitendo vya rushwa,” Bw. Msae alitoa rai.

Maadhimisho ya sherehe za miaka 62 ya Uhuru wa Tanzania Bara yalianza tangu Disemba 1 mwaka huu kwa kufanya shughuli mbalimbali za jamii ikiwemo kupanda miti na kufanya usafi.

Kuanzia tar 1 mkuu wa Wilaya ya Mbinga Bi. Aziza Mangosongo alifanya matukio mbalimbali ikiwemo kugawa madawati  kwa shule, kupanda miti na kuongea na waandishi wa habari kuelezea namna Mbinga ilivyopiga hatua.

Pia alipata fursa ya kuongea na wakuu wa Wilaya ya Kyela na Wanging’ombe  kuelezea fursa zilizopo Wilaya ya Mbinga ili waone namna ya kuja kuwekeza huku.

Naye Mhe. Mapunda, Mwenyekiti wa Halmashauri ya Mji wa Mbinga alishiriki katika zoezi la upandaji miti maeneo mbalimbali ikiwemo katika shule mpya ya Sekondari Matarawe.

Tamati ya Maadhimisho ya sherehe za uhuru ilikuwa Disemba 9  ambapo ulifanyika mdahalo wa kujadili maendeleo endelevu ambayo Wilaya ya Mbinga imefikia kwa kipindi cha miaka 62.