WANANCHI WAKUMBUSHWA KUWATHAMINI WAZEE.

Tarehe ya kuwekwa: October 6th, 2023

Na Elizabeth Newa, Rahma Mwaka & Erasto George

Mbinga.  Kaimu Afisa Tawala wa Wilaya ya Mbinga Bw. Andrea Mhagama, aliitumia siku ya wazee duniani kuikumbusha jamii juu ya umuhimu wa kuwathamini, kuwajali na kuwatunza wazee dhidi ya vitendo vya ukatili.

Bw. Mhagama alikuwa mgeni rasmi wa maadhimisho yaliyofanyika Oktoba 1, 2023, katika viwanja vya ofisi ya Kata ya Luhuwiko.

“Jukumu la kuwatunza wazee ni la jamii nzima kwa kuwa enzi za ujana wao nguvu zao zilitumika kuzalisha mali na kuliendeleza Taifa,” alisema Bw. Mhagama.

Alisistiza: "Maendeleo haya tunayoyaona sasa ni msingi mzuri uliowekwa na wazee hivyo ni jukumu letu sote kuwatengenezea mazingira mazuri ili waendelee kufurahia uzee wao.”

Bw. Mhagama ambaye  alimuwakilisha Mkuu wa Wilaya ya Mbinga Mhe. Aziza Mangosongo aliongeza kuwa kauli mbiu ya siku hiyo:  "Uthabiti wa Wazee kwenye Dunia yenye Mabadiliko" inalenga kuelimisha jamii juu ya mchango wa wazee kwenye Dunia ambayo ina mabadiliko makubwa ya sayansi na teknolojia.

Pia alìsema wazee wakiishi bila kubaguliwa, kunyanyaswa na kufanyiwa vitendo vya ukatili wana uwezo wa kuendelea kufanya kazi na kuwashauri vijana kuhusu umuhimu wa kufanya kazi na kuchochea maendeleo ya Taifa.

Aliwaagiza wataalamu wa afya kuhakikisha kuna sehemu ya kuwahudumia wazee ili wasipate changamoto kama ilivyoagizwa na serikali na kutoa ufafanuzi mzuri ili wazee waelewe vizuri  mwenendo wa afya zao.

Afisa Maendeleo ya jamii wa Halmashauri ya Mji wa Mbinga Bi. Cecilia Mbata aliyemuwakilisha Mkurugenzi wa Halmashauri hiyo, Bi Amina Seif, alisema wanajitahidi kutoa huduma mbalimbali kwa wazee kwa kuzingatia miongozo na maelekezo.

"Kupitia kitengo cha TASAF (Mpango wa Kunusuru Kaya Maskini) na idara ya Afya tunasimamia upatikanaji  wa huduma za afya na haki za wazee na  kupinga ukatili dhidi yao" Alisema Bi. Cecilia

Katika maadhimisho hayo yaliyofanyika kiwilaya Halmashauri ya Mji wa Mbinga, wazee waliweza kupata huduma  za afya ikiwemo kupima na kupata msaada wa kisaikolojia.

Maadhimisho yalitanguliwa na kongamano lililofanyika Septemba 30, 2023 katika Ukumbi wa mikutano wa Oddo Mwisho.

Katika kongamano hilo wadau walijadili mambo yahusuyo mmomonyoko wa maadili, ukatili dhidi ya wazee, malezi na namna bora ya kutatua changamoto zinazowakabili wazee.