WANANCHI WASHAURIWA KUJENGA KATIKA VIWANJA VILIVYOPIMWA

Tarehe ya kuwekwa: October 11th, 2023

Na Erasto George, Rahma Mwaka & Elizabeth Newa.

Mbinga. Mkuu wa idara ya Ardhi wa Halmashauri ya Mji wa Mbinga Bw. John Rikanga jana Oktoba 9, 2023 alitoa wito kwa wananchi wa Halmshauri hiyo kujenga maeneo yaliyopimwa na kupewa hati miliki ili kuepuka migogoro ya ardhi.

Bw. Rikanga alitoa wito huo  katika kampeni maalum ya kutoa elimu ya masuala yahusuyo usimamizi wa sheria, kanuni na taratibu za uendelezaji wa ardhi, kusikiliza na kutatua migogoro ya ardhi katika Halmashauri ya Mji wa Mbinga.

Alisema kutofuatilia hati miliki na kibali cha ujenzi kutoka idara ya Ardhi na Mipango Miji inaweza kupelekea kubomolewa nyumba na kukosa huduma za kijamii kama vile maji, umeme, barabara na afya.

"Kupitia ofisi zetu, mikutano ya hadhara ya mitaa na vijiji, na hata redio ambazo zipo katika Halmashauri yetu, tumekuwa tukitoa elimu kwa wananchi kuhusu maeneo wanayotaka kununua na kujenga nyumba," alisema Bw. Rikanga.

Aliongeza: " Halmashauri ya Mji wa Mbinga isiyokuwa na migogoro ya ardhi inawezekana kama kila mwananchi atazingatia taratibu zilizopo."

Mwananchi wa Halmashauri ya Mji wa Mbinga John Tiliah alieleza kwamba kuna umuhimu wa kumiliki viwanja vilivyopimwa ili kufikiwa na huduma za kijamii kwa urahisi.

Mwananchi mwingine, Alex Martin aliiomba serikali kuendelea kuwaelimisha wananchi kuhusu upimaji wa ardhi na kupata hati miliki ili kuepuka  migogoro ya ardhi.