WANANCHI WATAKIWA KUFUATA SHERIA ZA USALAMA BARABARANI ILI KUJIKINGA NA AJALI

Tarehe ya kuwekwa: October 10th, 2023

Na Alex Nelson Malanga

Afisa Habari----MTC

Mbinga. Kitengo cha Usalama Barabarani kimewataka watumia vyombo vya moto na waenda kwa miguu katika Halmashauri ya Mji wa Mbinga (MTC) kuheshimu sheria za usalama barabarani ili kuepusha ajali.

Wito huo ulitolewa jana Oktoba 9, 2023 wakati wa mkutano na walimu wote wa sekondari katika Halmashauri ya Mji wa Mbinga uliofanyika katika shule ya Sekondari Makita.

 Mkutano huo pia ulilenga kukumbushana majukumu mbalimbali yakiwemo ya maendeleo ya matumizi ya KPI (Key Performance Indicators) kwa walimu na programu ya shule salama.

Mkaguzi wa Jeshi la Polisi ambaye ndiye Mkuu wa Usalama Barabarani Wilaya ya Mbinga Augustino Pallangyo aliwataka watumishi wa umma kuwa mstari wa mbele katika kutoa elimu ya umuhimu wa kufuata sheria za barabarani.

“Tatizo la Watanzania tunaogopa mtu (askari wa usalama barabarani) kuliko sheria, hii si sawa,” alisema Bw. Pallangyo wakati wa mkutano ulioongozwa na Bw. Stuwart Kuziwa, Afisa Elimu---Sekondari katika Halmashauri ya Mji wa Mbinga

“Ukiona kuna uvunjifu wa sheria, toa taarifa ili kuepusha majuto ambayo yanaweza kutokea baada ya ajali.

 “Suala la elimu ya usalama barabarani si la mtu mmoja. Tunapaswa kushirikiana ili kutatua tatizo la ajali za barabarani hususani zinazohusisha bodaboda ambazo zimekuwa ni janga kubwa.

“Unakuta mtu anajifunza kuendesha pikipiki leo halafu kesho yuko barabarani, hii haikubaliki.”

Alionya: "Msipitie njia za panya kupata leseni."

Bw. Pallangyo aliwataka waendesha vyombo vya moto kuingia barabarani pindi tuu wanapokuwa na uwezo wa kudhibiti vyombo hivyo na si vinginevyo.

Aliongeza: “Ili kuhakikisha usalama wa wanafunzi pindi watumiapo barabara,  mnapaswa mara kwa mara kuwapa ABCs za usalama barabarani.”

Mkaguzi wa Magari katika Wilaya ya Mbinga Khalid Mgallah alisema: “Ajali za barabarani ni tatizo kubwa sana na suluhisho lake ni utoaji wa elimu kuhusu sheria za usalama barabarani.”