WATUMISHI WA HALMASHAURI ZA MKOA WA RUVUMA WAPATIWA MAFUNZO YA MFUMO MPYA WA MANUNUZI

Tarehe ya kuwekwa: August 29th, 2023

Na Alex Malanga

Afisa Habari----MTC

Mbinga. Mafunzo ya siku tano ya mfumo wa kielektroniki wa ununuzi wa umma (NeST) kwa watumishi wa Halmashauri za mkoa wa Ruvuma yalifunguliwa Augosti 28, 2023.

Mafunzo hayo yanaofanyika katika ukumbi wa Oddo Mwisho uliopo Halmashauri ya Mji wa Mbinga (MTC),  yalifunguliwa na Kaimu Katibu Tawala wa Mkoa wa Ruvuma Jumanne Mwankhoo.

Mafunzo yanaratibiwa na ofisi ya Mkuu wa Mkoa wa Ruvuma ikishirikiana na Mamlaka ya Udhibiti wa Ununuzi wa Umma (PPRA).

Washiriki ni maafisa sita kutoka kila Halamashauri.

Halmashauri husika ni zile za Mji wa Mbinga, Wilaya ya Mbinga, Wilaya ya Songea, Manispaa ya Songea, Wilaya ya Nyasa, Namtumbo, Madaba na Tunduru.

Bw. Mwankhoo alisema kutokana na ubora wa mfumo mpya, wanufaika wa mafunzo wanapaswa kuwa walimu wa watumishi wengine.

"Watumiaji wa mfumo wa zamani walikuwa ni kitengo cha manunuzi tuu lakini kwa sasa itakuwa ni vitengo vyote," alisema.

Bw. Mwankhoo aliongeza: " Ni mfumo muhimu. Tujitahidi kuuelewa. Baada ya siku tano za mafunzo  mkawe walimu na mabalozi wazuri wa mfumo huu."

Kwa vile taarifa za awali za wazabuni zitakuwa zimepitiwa na PPRA na kuthibitishwa na mifumo iliyounganishwa, taasisi za umma hazitapoteza muda kuanza kupitia upya taarifa hizo.

Hii ni kwa mujibu wa moja ya wakufunzi wa mafunzo hayo Piniel Mbura

Aliongeza kuwa kwakutumia mfumo mpya, taasisi za umma zinaweza kupata bidhaa au huduma zinazotaka kwa muda mfupi PPRA au taasisi nyingine kwani taasisi hizo zitakuwa na uwezo wa kuzipata kwenye mfumo.

“Mfumo huu utaondoa usumbufu wa kuwasilisha taarifa za michakato ya ununuzi,”aliongeza Bw. Mbura.

Mfumo wa NeST ni mbadala wa TANePS ambao umebainika kuwa na changamoto kadhaa zilizopelekea serikali kufanya mabadiliko ya mfumo.

Miongoni mwa changamoto hizo kwa mujibu wa moja ya wakufunzi wa mafunzo hayo Piniel Mbura ni mahitaji mbalimbali ya serikali pamoja na wazabuni kushindwa kutekelezwa na mfumo wa zamani.

Bw. Mbura alisema mfumo wa TANePS umekuwa na hitilafu za kiufundi za mara kwa mara.

Alisema kutokana na kutokana na mfumo ulivyojengwa na teknolojia ilivyotumika ikekuwa vigumu kufanya marekebisho ambayo yatakidhi mahitaji au kuondoa kabisa changamoto.

“Kumekuwa na malalamiko kwa baadhi ya watumiaji kutokana na mfumo kutokuwa rafiki,” alisema Bw. Mbura, ambaye pia ni katibu tawala msaidizi ---Usimamizi, Ufuatiliaji na ukaguzi.

Hadi Juni mwaka huu, wazabuni 37,445 na taasisi za umma 866 zilikuwa zinatumia TANePS.

“Taasisi zote za umma zinaendelea kupatiwa mafunzo na ifikapo Oktoba 1, 2023 hakuna ununuzi utakaofanyika nje ya NeST,” alisema Bw. Mbura.