WATUMISHI WA HOSPITALI YA MBUYULA WATAKAOKIUKA MAADILI YA KAZI YAO KUCHUKULIWA HATUA ZA KISHERIA

Tarehe ya kuwekwa: September 21st, 2023

Na Alex Nelson Malanga

Afisa Habari---MTC

Mbinga.  Uongozi wa Halmashauri ya Mji wa Mbinga (MTC) umetoa onyo kali kwa watumishi wa  Hospitali ya Halmashauri hiyo (Mbuyula) kutojihusisha  na vitendo vya rushwa au vitendo vingine ambavyo ni kinyume na maadili.

Onyo dhidi ya watumishi hao lililotolewa Septemba 19, 2023 wakati wa mkutano kati ya Mkurugenzi wa Halmashauri ya Mji wa Mbinga, Mganga Mkuu wa Hospitali ya Mbuyula, viongozi wa Taasisi ya Kuzuia na Kupambambana na Rushwa (TAKUKURU) pamoja na watumishi wa Hospitali hiyo.    

Mkurugenzi wa Halmashauri ya Mji wa Mbinga Bi. Amina Seif  alisema kama kuna watumishi wanaomba rushwa kwa watu ili wapewe huduma kwa haraka waache tabia hiyo ili kulinda taswira nzuri ya Hospitali.

 Aliwataka watumishi wajikite kwenye kuboresha huduma zao huku wakizingatia maadili ya kazi yao.

"Kazi hii ni ya wito, mnapaswa kuwa waadilifu, vinginevyo sheria itachukua mkondo wake kwa watakaobainika kujihusisha na vitendo visivyo vya kimaadili,” alionya Bi. Amina.

Afisa wa TAKUKURU Blandina Hamisi alisema taasisi yao iko kazini na kwamba watakaobainika watachukuliwa hatua za kisheria.

Alisema ni vizuri kuzuia rushwa ili wasifikie hatua ya kupambana na adui huyo ambaye ni kikwazo cha maendeleo.

“Wengi wetu tunatokea familia za kimaskini. Familia zinatugemea. Jamii inatutegemea,” alisema Bi. Blandina.

Aliongeza: “Fanyeni kazi kwa uadilifu ili mstaafu vizuri.”

Afisa TAKUKURU mwingine Ibrahim Magoti aliwataka watumishi wa umma kutumia elimu yao kutoa huduma bora huku wakizingatia maadili ya kazi zao.

“Tutoe huduma bila upendeleo. Tufuate kanuni na taratibu za Hospitali,” alisema Bw. Magoti.

Aliwataka watumishi kutoa taarifa kuhusu wenzao watakaojihusisha na vitendo vya rushwa.

“Mchuma janga hula na wa kwao. Kwahiyo tusilindane kwani ukiwalinda waovu inaweza kukurudia,” alisema Bw. Magoti.

“Ukiona mwenzako hana uadilifu, mwambie abadilike na ikiwezekana toa taarifa kwa uongozi ili tusichafue taswira ya Hospitali.

“Mtumishi wa umma ni kioo cha jamii hivyo tunapaswa kuwa waadilifu kwa kuwajibika kwa umma huku tukifuata sheria.”