WAZIRI WA UTAMADUNI AWATAKA WANANCHI WA MBINGA KUENZI MILA NA DESTURI

Tarehe ya kuwekwa: October 31st, 2023

Na Rahma Mwaka, Elizabeth Newa & Erasto George

Mbinga. Waziri wa Utamaduni, Sanaa na Michezo Mhe. Dkt. Damas Ndumbaro amesema utandawazi umekuwa ni chanzo kikubwa cha mmomonyoko wa maadili kwa kuwa baadhi ya jamii za kitanzania zimeacha kufuata mila na desturi zao.

Katika muktadha huo, aliwataka wamatengo na wananchi wote wa Mbinga kwa ujumla kuendelea kuzilinda na kuzienzi mila na desturi zao ili ziendelee kuwepo siku zijazo.

Mhe. Dkt.  Ndumabaro aliutoa wito huo jana Oktoba 30, 2023 katika tamasha la siku ya wamatengo lililofanyika katika kijiji cha Mtama, kata ya Utiri, ambapo alikuwa mgeni rasmi.

"Jamii isiyokuwa na utamaduni ni jamii mfu, hivyo ninalipongeza Baraza la Makumbusho kwa kuandaa tamasha hili kwa kuwa linalenga kudumisha na kurithisha utamaduni kwa kizazi hiki na kijacho,” alisema Mhe. Dkt. Ndumbaro.

Alimwagiza mkurugenzi wa Halmashauri ya Mji wa Mbinga Bi. Amina Seif kujenga jengo la Makumbusho ya wamatengo katika kijiji cha Mtama, kata ya Utiri ambapo walifanyia tamasha hilo kwa mwaka huu.

“Tamasha hili liendelee kufanyika hapa kwa kuwa ndio asili ya wamatengo na itakuwa chanzo cha utalii pamoja na kukuza utamaduni wa kimatengo,” alisisitiza Mhe. Dkt. Ndumbaro.  

Mkuu wa Wilaya ya Mbinga Mhe. Aziza Mangosongo alisema wazee wa Baraza la Makumbusho wanastahili pongezi kwa kuwa wametambua umuhimu wa kudumisha mila na desturi za kimatengo.

“Chama cha Mapinduzi kinatambua mila na desturi katika ilani yake hivyo viongozi tunatekeleza ilani ya chama kwa kushirikiana nanyi katika shughuli kama hii,” alisema Mhe. Aziza.

Mwenyekiti wa Baraza la Makumbusho (Mbinga) Bw. Osmund Kapinga alisema vijana wamekuwa wakidharau mila na desturi ambapo hupelekea mmonyoko wa maadili.

Aliwashauri vijana ambao bado wapo shuleni kusoma masomo ya sayansi ili waweze kubuni zana za kisasa na kuondokana na zana za jadi ambazo hutumika katika kilimo.