‎ZAIDI YA MILIONI 600 KUTEKELEZA MIRADI YA ELIMU MBINGA MJI

Tarehe ya kuwekwa: August 12th, 2025

‎‎Mbinga. Halmashauri ya Mji wa Mbinga imepokea kiasi cha shilingi milioni 622,380,905 kwa mwaka wa fedha 2025/26 kutoka kwa wahisani kupitia Mradi wa BOOST kwa ajili ya kutekeleza miradi ya kuboresha miundombinu ya elimu.

‎

‎Miradi hiyo inahusisha ukarabati wa vyumba sita vya madarasa na ofisi tatu katika Shule ya Msingi Mbinga, ujenzi wa vyumba viwili vya madarasa na matundu sita ya vyoo katika Shule ya Msingi Kipungu, pamoja na ujenzi wa vyumba viwili vya madarasa katika Shule ya Msingi Nyerere.

‎

‎Aidha, Shule ya Msingi Lusonga itanufaika na ujenzi wa vyumba viwili vya madarasa na matundu sita ya vyoo, huku Mbambi Sekondari ikipatiwa shule mpya ya elimu ya awali na msingi.

‎

‎Taarifa kuhusu utekelezaji wa miradi hiyo zimetolewa katika kikao kilichofanyika kwenye ukumbi wa Mkuu wa Wilaya ya Mbinga, kilichohudhuriwa na Mkuu wa Wilaya, Mkurugenzi wa Halmashauri, pamoja na wataalamu kutoka Halmashauri ya Mji wa Mbinga.

‎

‎Mkuu wa Wilaya ya Mbinga, Mhe. Kisare Matiku Makori, amesisitiza umuhimu wa miradi hiyo kukamilika kwa wakati ili kuboresha mazingira ya kujifunzia kwa watoto na kuinua kiwango cha elimu katika jamii.

‎

‎Amewaelekeza wasimamizi wa miradi kuhakikisha fedha zilizotolewa zinatumika ipasavyo kwa malengo yaliyokusudiwa, na kununua vifaa vya ujenzi kulingana na mahitaji halisi ya miradi.

‎

‎Naye Mkurugenzi wa Halmashauri ya Mji wa Mbinga, Bi. Amina Seif, ameeleza kuwa ni muhimu kuwa na msimamizi mmoja wa miradi katika kila kata ili kuhakikisha usimamizi thabiti na kutoa rai kwa kamati za ujenzi kuhakikisha hakuna utofauti wa bei za vifaa vya ujenzi katika miradi inayofanana.

‎

‎Amesisitiza ushirikishwaji wa wananchi katika utekelezaji wa miradi hiyo, akiwataka kujitolea katika kazi kama kuchimba msingi na mashimo ya vyoo ili kupunguza gharama za ujenzi.