MBINGA YAFUNGUA FURSA MPYA ZA UWEKEZAJI

Tarehe ya kuwekwa: January 17th, 2026

MBINGA, RUVUMA: Wilaya ya Mbinga imetangaza mkakati mpya wa kukuza uchumi wake kupitia uwekezaji wa viwanda, maghala ya kisasa ya kuhifadhia chakula, na ujenzi wa makazi bora, ikiwa ni sehemu ya utekelezaji wa maelekezo ya Serikali ya kuimarisha sekta ya biashara nchini.

Mkakati huo umebainishwa na Mkuu wa Wilaya ya Mbinga, Mhe. Kisare Makori, wakati akiongoza Kikao cha Baraza la Biashara la Wilaya hiyo kilichohusisha viongozi wa Halmashauri zote mbili (Halmashauri ya Mji Mbinga na Halmashauri ya Wilaya ya Mbinga) pamoja na wadau wa sekta binafsi. Kikao hicho kilifanyika katika ukumbi wa Ofisi ya Mkuu wa Wilaya tarehe 16 Januari 2026.

Akizungumza katika kikao hicho, Mhe. Makori amesema Wilaya imejipanga kikamilifu kwa kutenga maeneo maalum ya uwekezaji katika Kata ya Kitanda (Halmashauri ya Mji) na Maguu (Halmashauri ya Wilaya), ambapo viwanja kwa ajili ya viwanda na taasisi vimeanza kuandaliwa kwa ajili ya kuuzwa kwa wawekezaji.

"Tunapiga hatua kubwa kwenye miradi ya maendeleo inayotekelezwa na Halmashauri zetu, lakini lengo letu kuu ni kuhakikisha maendeleo haya yanaenda sambamba na kuweka mazingira rafiki ya kufanya biashara na uwekezaji ili kufikia malengo ya kitaifa," alisema Mhe. Makori.

Aidha, Mkuu huyo wa Wilaya amewahimiza watendaji wa Halmashauri kuhakikisha wanatatua kero ndogo ndogo zinazowakabili wafanyabiashara ili kuongeza thamani ya uwekezaji wilayani humo. Amebainisha kuwa kuimarika kwa maghala ya chakula na viwanda kutasaidia wakulima wa Mbinga kuongeza thamani ya mazao yao na kupanua soko.

Kwa upande wao, Wakurugenzi wa Halmashauri hizo wakiongozwa na Kaimu Mkurugenzi wa Mji Mbinga, Bw. Maurusi Ndunguru, wameahidi kufanyia kazi changamoto zote zilizoibuliwa na Baraza la Biashara ili kuhakikisha miradi mipya inayotekelezwa inaleta tija ya haraka kwa wananchi.

Nao wawakilishi wa wafanyabiashara na wadau wa maendeleo wameishukuru Serikali kwa hatua hizo, wakieleza kuwa upatikanaji wa viwanja vya uwekezaji na ujenzi wa maghala utachochea kasi ya ukuaji wa biashara na kuongeza mzunguko wa fedha ndani ya wilaya hiyo inayosifika kwa uzalishaji wa mazao ya chakula na biashara.

Mbinga sasa inatajwa kuwa moja ya wilaya zenye fursa kubwa mkoani Ruvuma kutokana na mipango yake ya kugawa maeneo ya makazi na viwanda yanayofikika kwa urahisi, jambo linalotajwa kuwa chachu ya maendeleo ya kiuchumi na kijamii.