‎MBINGA MJI YAPONGEZWA KWA KUPATA HATI SAFI

Tarehe ya kuwekwa: June 19th, 2025

‎Na Erasto George

‎Mbinga. Katibu Tawala wa Mkoa wa Ruvuma, Bi. Mary Makondo, ameipongeza Halmashauri ya Mji wa Mbinga kwa kupata hati safi katika ripoti ya Mdhibiti na Mkaguzi Mkuu wa Hesabu za Serikali (CAG) kwa mwaka wa fedha 2023/24.

‎

‎Akizungumza kwa niaba ya Mkuu wa Mkoa, Kanali Ahmed Abbas Ahmed, kwenye Baraza Maalum la kujadili hoja za CAG  katika ukumbi wa mikutano wa Oddo Mwisho, Bi. Makondo amesema mafanikio hayo ni matokeo ya uongozi makini na usimamizi mzuri wa fedha za umma.

‎

‎Kwa mujibu wa ripoti ya CAG, jumla ya hoja 26 zilitolewa kwa Halmashauri ya Mji wa Mbinga, kati ya hoja hizo 6 zimefungwa, hoja 20 zinaendelea kufanyiwa kazi.

‎

‎Makondo ametoa maagizo kwa wakuu wa idara na vitengo kushiriki kikamilifu katika kuandaa majibu na mpango kazi wa kutekeleza  hoja na mapendekezo ya CAG , pia Mkurugenzi wa Halmashauri anapaswa kuchukua hatua za kinidhamu mapema dhidi ya mtumishi yeyote anayesababisha hasara au hoja kwa uzembe.

‎

‎Kwa upande wake, Mkuu wa Wilaya ya Mbinga, Mheshimiwa Kisare Matiku Makori, amewapongeza madiwani na watumishi wote kwa kujituma kwao, hatua iliyochangia upatikanaji wa hati safi akisisitiza ufanisi huo ni mfano bora wa utawala unaozingatia maadili na uwajibikaji.

‎