PPRA KANDA YA KUSINI YAWAJENGEA UWEZO WATUMISHI MBINGA TC KUHUSU SHERIA YA UNUNUZI WA UMMA

Tarehe ya kuwekwa: January 19th, 2026

Watumishi wa Halmashauri ya Mji Mbinga leo tarehe 19 Januari 2026 wamepatiwa mafunzo ya Mfumo wa Manunuzi ya Umma (NeST) pamoja na sheria na taratibu za Ununuzi wa Umma, ikiwa ni sehemu ya juhudi za kuwajengea uwezo katika utekelezaji wa manunuzi kwa kuzingatia sheria, kanuni na miongozo iliyopo.

Mafunzo hayo yametolewa na Mamlaka ya Udhibiti wa Manunuzi ya Umma (PPRA) Kanda ya Kusini, ikiwa ni muendelezo wa utoaji wa elimu kwa watumishi wa umma kuhusu matumizi sahihi ya mfumo wa NeST na uelewa wa Sheria ya Ununuzi wa Umma.

Akifungua mafunzo hayo, Kaimu Mkurugenzi wa Halmashauri ya Mji Mbinga, Bw. Enock Ndunguru, amewasisitiza watumishi kushiriki kwa umakini ili kuongeza uelewa wao kuhusu taratibu za manunuzi, wajibu wa idara tumizi na idara ya manunuzi, pamoja na makatazo yanayopaswa kuepukwa katika utekelezaji wa manunuzi ya umma.

Mafunzo hayo yamefanyika katika ukumbi mdogo wa Halmashauri ya Mji Mbinga na yamehudhuriwa na wakuu wa idara, vitengo pamoja na watumishi kutoka idara mbalimbali.