Waratibu Elimu Kata Wakabidhiwa Pikipiki 19 Mbinga Mjini

Tarehe ya kuwekwa: July 27th, 2018

Akizungumza na Waratibu Elimu Kata wa Kata kumi na tisa (19) za Halmashauri ya Mji wa Mbinga, Mkurugenzi wa Mji  Robert K. Mageni alisema kuwa ujio wa Pikipiki hizo uwe ni chachu ya kuinua kiwango cha  Elimu katika Halmashauri ya Mji wa Mbinga na kamwe pikipiki hizo zisitumike kinyume na malengo yaliyokusudiwa kama vile kuonekana sehemu za vilabu vya pombe. Hafla hiyo ya makabidhiano imefanyika leo tarehe 27/07/2018 saa 2:00 Mchana katika viunga vya Ofisi ya Halmashauri ya Mji Mbinga na kuhudhuriwa na Maafisa Elimu Msingi na Sekondari wa Mji.

Waratibu Elimu Kata kwa upande wao wameishukuru Serikali ya awamu ya Tano inayoongozwa na Dk. John Pombe Magufuli  kwa jitihada za dhati za kuinua kiwango cha elimu hasa kwa kuona kuwa kuna haja sasa ya kuwezesha vyombo vya usafiri kwa Waratibu wa Elimu Kata ili kurahisisha shughuli ya ufuatiliaji wa Elimu katika Kata zao.

“…tulikuwa tunapata shida sana katika kuzifikia shule katika Kata zetu kwani utakuta Kata ina shule 3, 4, au 5, lakini shule hizo zipo mbalimbali hivyo kuzifikia zote kwa haraka ilikuwa ni vigumu……lakini kwa ujio wa pikipiki hizi kutarahisisha zoezi zima la ufuatiliaji wa Elimu katika Kata zetu…”Alisema Mwl. Emmanuel Matembele (Mratibu Elimu Kata wa Kata ya Kihungu-Mbinga Mjini).