‎JAMII YAHIMIZWA KULINDA HAKI ZA WATOTO

Tarehe ya kuwekwa: June 16th, 2025

‎Mbinga. Maadhimisho ya Siku ya Mtoto wa Afrika yamefanyika katika viwanja vya Shule ya Msingi Kitanda, kata ya Kitanda, yakiongozwa na kauli mbiu 'Haki za mtoto; tulipotoka, tulipo na tuendako.'

‎

‎Mgeni rasmi, Afisa Tarafa ya Mbuji, Bi. Salma Kipande, akimwakilisha Mkuu wa Wilaya ya Mbinga, Mhe. Kisare Matiku Makori, amesisitiza kuwa lengo la maadhimisho hayo ni kuwakumbusha wazazi, walezi na jamii kwa ujumla kuhusu haki, wajibu, na usalama wa mtoto.  

‎

‎"Tunapaswa kutafakari jinsi haki za mtoto zinavyotekelezwa, zikiwemo haki ya kuishi, kushirikishwa, kutobaguliwa, kuendelezwa na kulindwa,"alisema Bi. Salma.  

‎

‎Aidha, ameeleza kuwa serikali imekuwa ikichukua hatua mbalimbali ili kuhakikisha watoto wanapata haki zao kwa viwango vyote, ikiwa ni pamoja na kutunga Sera ya Maendeleo ya Mtoto ya mwaka 2008 na Sheria ya Mtoto ya mwaka 2009.  

‎

‎Ameongeza kuwa Serikali imeanzisha mifumo mbalimbali inayosaidia kulinda haki za watoto, ikiwemo uwepo wa madawati ya jinsia na watoto, madawati ya msaada wa kisheria, pamoja na huduma za ustawi wa jamii.  

‎

‎Siku ya Mtoto wa Afrika huadhimishwa zaidi katika nchi wanachama wa Umoja wa Afrika, kwani chimbuko lake ni mauaji ya watoto takribani 2,000 yaliyofanywa na utawala wa Makaburu nchini Afrika Kusini mnamo Juni 16, 1976.  Umoja wa Afrika uliamua kuenzi siku hiyo kama kumbukumbu ya tukio hilo na kuendelea kuhamasisha haki za watoto