HALMASHAURI YA MJI WA MBINGA YAZINDUA MPANGO WA UKOPESHAJI MITAJI VIKUNDI VYA WANAWAKE NA VIJANA KUPITIA 10% YA PATO LA NDANI

Tukio hilo limefanyika leo katika ofisi za Halmashauri ya Mji wa Mbinga huku wawakilishi wa vikundi 10 kutoka maeneo mbalimbali ya Mji wa Mbinga wakuihudhuria. Akimkaribisha mgeni rasmi Mkurugenzi wa Mji Ndg. Robert K. Mageni amesema kuwa lengo la Halmashauri ni kutimiza kwa vitendo mpango wa bajeti unaoelekeza kuwa 10% ya pato la ndani litumike kuwapatia mikopo vikundi vya wanawake na vijana ili kuweza kuwainua kiuchumi na kuondokana na umaskini.

Akisoma taarifa mbele ya mgeni rasmi, Afisa kilimo wa Mji wa Mbinga Ndg. Maganga Ngahy amesema kuwa jumla ya vikundi 9 vinapata mkopo wa Mbegu za Tangawizi kilo 3900, Wanawake vikundi 3 na vijana vikundi 6 wenye thamani ya Tshs. 4,000,000/=(Milioni nne). Vikundi vilivyopata mkopo ni pamoja na NAKATETE- VIJANA (LIPILIPILI), AMANI- VIJANA (MPEPAI), TUPENDANE-VIJANA (PACHASITA), RANATA-WANAWAKE (KIHUNGU), TUELIMIKE-VIJANA (MIEMBENI), MJIMWEMA-VIJANA (MASIMERI), UMOJA-WANAWAKE (KIKOLO), JITUME-WANAWAKE (KIHUNGU) NA MATUMAINI-WANAWAKE (LUHANGAI). Vikundi hivyo vimepewa mikopo hiyo ambapo watarejesha kwa riba ya asilimia 10%. Halmshauri imekubali marejesho hayo yatafanyika baada ya mavuno kwa msimu wa 2017/2018.

Akihutubia wanavikundi Mgeni rasmi katika hafla hiyo Ndg. Cosmas Nshenye mkuu wa Wilaya ya Mbinga, amempongeza Mkurugenzi wa Halmashauri ya Mji wa Mbinga Ndg. Robert K. Mageni kwa kutekeleza kwa vitendo ukopeshaji wa mitaji kwa vikundi vya wanawake na vijana. Amesema kuwa vikundi hivyo vinapaswa kutumia vizuri mikopo hiyo ili lengo la Serikali la kuinua uchumi wa wanawake na vijana litimie na hivyo waweze kuondokana na umaskini. Aliongza kuwa kwa kurejesha kwa wakati mikopo hiyo kutawawezesha vikundi vingine kupata mikopo kama hiyo.

Mhe. Mkuu wa Wilaya hakusita kuzungumzia umuhimu wa vijana kuunda vikundi kuwa ni pamoja , kukuza mtaji, kuongeza uelewa kwa vijana, ni rahisi kukopesheka na upatikanaji msaada.

Mwakilishi wa vikundi vilivyopata mkopo Bi. Renatha Cosmas Mbepera wa kikundi cha TUELIMIKE (MIEMBENI) ameshukuru uongozi wa Halmashauri ya Mji wa mbinga kwa vikundi kupewa mikopo hiyo na amesema kuwa mikopo hiyo itatumika kama ilivyokusudiwa na hivyo lengo la serikali la kuwawezesha vijana lifanikiwe.