MKURUGENZI MBINGA MJI APOKEA RIPOTI YA AWALI YA MAFUNZO NA UANDAAJI WA MPANGO MKAKATI WA MIAKA MITANO

Tarehe ya kuwekwa: January 19th, 2026

Mkurugenzi wa Halmashauri ya Mji Mbinga, Bi. Amina Seif, leo tarehe 20 Januari 2026 amepokea ripoti ya awali ya mafunzo ya kujengea uwezo na uandaaji wa Mpango Mkakati wa Halmashauri ya Mji Mbinga kwa kipindi cha miaka mitano (2026–2030).

Ripoti hiyo imewasilishwa na Timu ya Mpango Mkakati ya Halmashauri katika kikao maalum kilicholenga kutoa mrejesho wa mafunzo hayo, ambayo yamelenga kuwajengea uwezo wataalamu wa Halmashauri katika masuala ya upangaji, utekelezaji na ufuatiliaji wa Mpango Mkakati.

Wakati wa uwasilishaji wa ripoti hiyo, wataalamu wa Halmashauri wamemshukuru Mkurugenzi kwa kuwawezesha kushiriki mafunzo hayo yenye tija kwa taasisi, na kuahidi kuyafanyia kazi kwa vitendo ili kuleta matokeo chanya katika utekelezaji wa majukumu ya Halmashauri.

Akizungumza baada ya kupokea ripoti hiyo, Bi. Amina Seif amewapongeza wataalamu kwa maandalizi na wasilisho zuri, huku akiwahimiza kuyatekeleza kikamilifu maarifa na ujuzi walioupata ili Mpango Mkakati huo uwe chachu ya maendeleo, ufanisi wa utendaji kazi na ustawi wa watumishi pamoja na wananchi kwa ujumla.

Mafunzo hayo ni sehemu ya maandalizi ya uandaaji wa Mpango Mkakati wa Halmashauri ya Mji Mbinga kwa miaka mitano kuanzia mwaka 2026 hadi 2030.