HALMASHAURI YA MJI WA MBINGA YAVUKA LENGO LA UPANDAJI MITI KWA ASILIMIA 6.7

Tarehe ya kuwekwa: February 1st, 2024

Na Alex Nelson Malanga

Afisa Habari---Mbinga TC

Mbinga.  Wakati serikali ikiitaka kila Halmashauri kupanda miti milioni 1.5 kwa mwaka, Halmashauri ya Mji wa Mbinga kwa kushirikiana na wadau mbalimbali wa misitu tayari imevuka lengo hilo kwa asilimia 6.7, ikiwa ni miezi minne kabla ya mwaka huu wa fedha kukamilika.  

Mheshimiwa Rais wa Jamhuri ya Muungano wa Tanzania aliwahi kunukuliwa na vyombo vya habari akitoa agizo kwa kila Halmashauri kupanda miti milioni 1.5 kwa mwaka ikiwa ni jitihada za Serikali za kuhakikisha mazingira yanahifadhiwa na kutunzwa.

Akizungumza wakati wa uzinduzi wa kampeni ya upandaji miti mashuleni siku ya Jumatano, Januari 31, 2024, Afisa Misitu wa Halmashauri ya Mji wa Mbinga Bw. Sota January Ndunguru alisema tayari Halmashauri kwa kushirikiana na wadau mbalimbali wa misitu, imezalisha miche milioni 1.6.

Uzinduzi wa kampeni hiyo uliofanyika katika shule ya Msingi Mkwaya, Kata ya Kilimani, ulihudhuriwa na Makamu Mwenyekiti wa Halmashauri ya Mji wa Mbinga Mhe. Alex Andoya, ambaye alikuwa mgeni rasmi na Kaimu Mkurugenzi wa Halmashauri Dkt. Kung’e Nyamuryekung’e.

Wengine waliohudhuria ni Mwenyekiti wa kamati ya Mazingira ya Halmashauri ya Mji wa Mbinga Mhe. Amanyisye Ngonepo, wakuu wa Idara na Vitengo wa Halmashauri na wadau mbalimbali wa misitu na mazingira.

“ Katika mwaka wa fedha 2023/24 Halmashauri ya Mji wa Mbinga kwa kushirikiana na wadau mbalimbali wa misitu imezalisha miche ya miti milioni 1.6,” alisema Bw. Ndunguru, huku akiwataja wadau hao kuwa ni Wakala wa Huduma za misitu (TFS), Mfuko wa Misitu na watu binafsi.

Miche ya miti iliyozalishwa ni ni ile ya matunda, rafiki wa maji, mbao, kivuli na mapambo.

Kati ya miche ya miti milioni 1.6 iliyozalishwa, ya kivuli, mbao na mapambo ni milioni 1.347, matunda 232, 890 na vyanzo vya maji 22, 920.

Mhe. Andoya, kwa upande wake, aliwaagiza walimu wakuu wa shule mbalimbali kutengeza utaratibu wa kila mwanafunzi kumiliki mti wake na kuhakikisha anautunza.

“Hii miti tunayopanda tunapaswa kuitunza. Hatutakiwi kuitelekeza huko mbeleni,” aliagiza Mhe. Andoya ambaye pia ni Diwani wa Kata ya Kilimani.

Kwa upande wake Mhe. Ngonepo ambaye pia ni diwani wa Kata ya Betherehemu alishauri vijiji kutunga sheria ndogondogo ili kuhakikisha miti inatunzwa.