MAAFISA HABARI WATAKIWA KUTOA TAARIFA SAHIHI KWA WANANCHI

Tarehe ya kuwekwa: May 23rd, 2025

‎‎Waziri wa Nchi, Ofisi ya Rais – TAMISEMI, Mhe. Mohamed Mchengerwa, ametoa wito kwa Maafisa Habari kuhakikisha wananchi wanapata taarifa sahihi kuhusu kazi mbalimbali zinazotekelezwa na Serikali.

‎

Akizujgumza wakati wa kikao cha Maafisa Habari wa Mikoa na Mamlaka za Serikali za Mitaa, kilichofanyika katika Ukumbi wa Jiji Dodoma, uliopo kwenye Mji wa Serikali Mtumba, Dodoma, Mhe. Mchengerwa amesisitiza umuhimu wa jukumu la Maafisa Habari katika kufanikisha haki ya msingi ya wananchi kupata taarifa kwa wakati.  

‎

‎"Maafisa Habari mnayo dhamana kubwa ya kuhakikisha kuwa wananchi wanapata haki yao ya msingi ya kupata taarifa sahihi na kwa wakati," alisema Mhe. Mchengerwa.  

‎

‎Mhe. Mchengerwa amewaelekeza Maafisa Habari kushiriki kikamilifu katika ziara za viongozi, tathmini na ufuatiliaji wa miradi ya maendeleo, hatua ambayo inalenga kuwawezesha kupata uelewa mpana kuhusu kazi zinazotekelezwa na halmashauri ili waweze kuziwasilisha ipasavyo kwa umma.  

‎

‎"Nitoe pongezi kwa Maafisa Habari wa Mikoa na Mamlaka za Serikali za Mitaa kwa kazi nzuri mnayoendelea kuifanya katika kutangaza shughuli za Serikali, hongereni sana na endeleeni kutimiza wajibu wenu, kwani sisi viongozi wenu, kama sehemu ya Serikali, tutaendelea kuwapa ushirikiano," alisema Mhe. Mchengerwa.