MKUU WA WILAYA YA MBINGA AONGOZA MASHABIKI WA YANGA KUTEMBELEA WATOTO WENYE ULEMAVU WA NGOZI

Tarehe ya kuwekwa: November 14th, 2023

Na Erasto George

Mbinga.  Mashabiki wa timu ya Yanga wa Halmashauri ya Mji wa Mbinga wametembelea kituo cha Mtakatifu Albino kilichopo katika Jimbo Kuu Katoliki la Mbinga (Mtakatifu Kilian) kwa lengo la kutoa msaada kwa watoto wenye ulemavu wa ngozi.

Katika tukio hilo lililofanyika mwishoni mwa wiki jana, Mkuu wa Wilaya ya Mbinga Mhe. Aziza Mangosongo aliwaongoza mashabiki hao kutoa msaada wa   Mbuzi, sukari, sharubati, biskuti na kalamu za wino, pamoja na mahitaji mengine.  

Hatua hiyo ilifikiwa na mashabiki hao ikiwa ni kusherekea ushindi  mnene wa magoli 5-1 dhidi ya watani wao Simba SC katika mchezo wa ligi kuu Tanzania bara.

Mhe. Aziza aliwataka mashabiki wa Yanga kuendeleza utamaduni huo wa kutembelea kituo hicho bila kujali matokeo wanayopata pindi wawapo uwanjani.

Pia aliwataka mashabiki wa Yanga na Simba kudumisha amani kwa kuwa mpira ni furaha na upendo, hivyo wawe wavumilivu pindi timu zao zinapopata matokeo ya tofauti na ushindi.

“Tuitumie michezo kuchochea na kuilinda amani tuliyonayo na isiwe chanzo cha vurugu,” alisisitiza Mhe. Aziza.

Mlezi wa kituo hicho, Sister Tekla Nombo alimshukuru Mkuu wa Wilaya na mashabiki wa Yanga SC kwa kutembelea kituo hicho na kutoa msaada.

“Kitu mlichokifanya kina thamani kubwa kwa watoto hawa na mmejenga upendo mkubwa ndani ya mioyo yao, tunashukuru sana,” alisema Sister Tekla.

Nae Mwenyekiti wa Halmshauri ya Mji wa Mbinga Mhe. Mh Kelvin Mapunda alimpongeza Mkuu wa Wilaya ya Mbinga na mashabiki wa Yanga kwa  kutembelea kituo hicho cha watoto wenye ulemavu wa ngozi.